Snuker üzrə 2026-cı il dünya çempionatı dramatik final ilə yadda qaldı. Çinli gənc idmançı U İtze karyerasında ilk dəfə “Crucible” səhnəsində çempionluğa yüksəldi. O, həlledici qarşılaşmada təcrübəli Şon Mörfini 18:17 hesabı ilə məğlub edərək turnirin qalibi oldu və bu uğurla ardıcıl ikinci dəfə Çin təmsilçisi dünya çempionu adına sahib çıxdı.
Tarixə düşən final
Final görüşü snuker tarixinin ən gərgin oyunlarından biri kimi yadda qaldı. Tərəflər ümumilikdə üç sençuri seriyası həyata keçirdi, 29 dəfə isə 50-dən yuxarı breyk qeydə alındı. Oyunun sürətli tempi diqqət çəkdi – hər freymin orta müddəti cəmi 17 dəqiqə olub.
Hesab 17:17 olduğu anda taleyüklü son – 35-ci freym başladı. U İtze həlledici məqamda riskə gedərək çətin qırmızı şarı orta cibə göndərdi və ardınca 85 xallıq möhtəşəm seriya ilə qələbəni təmin etdi. Bu uğur ona 500 min funt sterlinq mükafat və dünya çempionu titulunu qazandırdı.
Çin snukerinin yeni ulduzu
22 yaş 202 günlüyündə çempion olan U İtze snuker tarixində ən gənc qaliblər siyahısında ikinci pilləyə yüksəldi. O, yalnız 1990-cı ildə 21 yaşında titul qazanan Stiven Hendridən geri qalır. Bununla yanaşı, o, “Crucible”də çempion olan 25-ci oyunçu kimi tarixə düşdü.
Son illərdə ardıcıl olaraq yeni çempionların meydana çıxması diqqət çəkir. Bu seriya Luka Bressel, Kayren Uilson və Çjao Sintun kimi qaliblərlə davam etmişdi. U İtze isə bu ənənəni qoruyaraq snuker dünyasında yeni güc mərkəzinin formalaşdığını bir daha göstərdi.
Çempion çıxışında ailəsinə təşəkkür edərək bildirib: “Bu qələbəni valideynlərimə, özümə və ölkəmə həsr edirəm. Onlar mənim ən böyük dəstəyimdir”. O, əlavə edib ki, finalın son hissəsində böyük təzyiq hiss edib və indi sadəcə dincəlmək istəyir.
Şon Mörfi isə görüşdən sonra rəqibini yüksək qiymətləndirərək onun böyük istedada sahib olduğunu vurğulayıb və belə bir finalda uduzmasına baxmayaraq çıxışından qürur duyduğunu bildirib.
