Azərbaycanda keçirilən “Bakı–Xankəndi” beynəlxalq velosiped yarışında mübarizə davam edir. Bu gün turnirin ikinci mərhələsi təşkil olunur və iştirakçılar 193,2 kilometrlik marşrut üzrə mübarizə aparırlar.
Velosipedçilər yarışa paytaxt Bakıdan başlayıblar. Marşrut Şamaxı rayonundan keçərək İsmayıllıda başa çatacaq. İkinci etap həm məsafənin uzunluğu, həm də relyef baxımından yarışın ən çətin hissələrindən biri hesab olunur.
İlk mərhələdə Aleksey Şnirko qalib gəldi
Yarışın ilk etapında Çinin “Li-Ninq Star” komandasının üzvü Aleksey Şnirko finiş xəttini hamıdan əvvəl keçərək mərhələ qalibi olub. Belaruslu velosipedçi sürətli finişi ilə fərqlənib və ümumi təsnifatda liderliyə yüksəlib.
Birinci mərhələnin nəticələri:
- Aleksey Şnirko (“Li-Ninq Star”)
- Mateo Maluçelli (“Team Corratec”)
- Lev Qonov (“Astana Qazaqstan Development Team”)
Yarış Beynəlxalq Velosipedçilər İttifaqının (UCI) 2.1 kateqoriyası üzrə keçirilir. Turnirdə dünyanın 20 ölkəsini təmsil edən 24 komanda iştirak edir. Beş mərhələdən ibarət yarışın ümumi mükafat fondu 50 min avrodan artıqdır.
Final mərhələsi Xankəndidə olacaq
Təşkilatçılar bildirirlər ki, yarışın əsas məqsədi Azərbaycanda velosiped idmanının inkişafını sürətləndirmək, ölkənin beynəlxalq yarışlara ev sahibliyi imkanlarını nümayiş etdirmək və işğaldan azad edilmiş ərazilərin idman tədbirləri vasitəsilə tanıdılmasına töhfə verməkdir.
Turnirə mayın 14-də yekun vurulacaq. Yarışın final mərhələsi Xankəndi şəhərində keçiriləcək və qaliblərin ümumi nəticələri məhz həmin etapdan sonra müəyyənləşəcək.
