Argentina futbolunda mövsümün ən böyük sensasiyalarından biri yaşanıb. Çempionluğa əsas namizədlər sırasında göstərilməyən “Belqrano” tarixində ilk dəfə ölkə çempionu olmağı bacarıb. Komanda həlledici qarşılaşmada Argentina nəhəngi “River Pleyt”i 3:2 hesabı ilə məğlub edərək kuboku başı üzərinə qaldırıb.
1905-ci ildə yaradılan klub düz 121 ildən sonra ilk böyük titulunu qazanaraq azarkeşlərinə unudulmaz sevinc yaşadıb. “General” ləqəbli komanda adını Argentinanın milli qəhrəmanı Manuel Belqranodan götürür və uzun illər ölkə futbolunda orta səviyyəli kollektiv kimi tanınıb.
İkinci liqadan zirvəyə gedən yol
“Belqrano”nun uğuru xüsusilə son illərin fonunda daha diqqətçəkici görünür. Komanda cəmi bir neçə mövsüm əvvəl aşağı liqalarda çıxış edir, hətta kursantlar arasında keçirilən turnirlərdə mübarizə aparırdı. Qısa müddətdə qurulan yeni layihə isə klubun tarixini tamamilə dəyişib.
Komandanın uğurunda baş məşqçi Rikardo Zelinskinin rolu xüsusi qeyd olunur. Polşa əsilli 66 yaşlı mütəxəssis 1990-cı illərin ortalarından Argentina futbolunda çalışır və ölkənin ən təcrübəli məşqçilərindən biri hesab edilir. Onun rəhbərliyi altında “Belqrano” intizamlı oyun tərzi və əzmkar çıxışı ilə seçilib.
Həlledici final matçında “River Pleyt”ə qarşı nümayiş etdirilən futbol da bunu təsdiqlədi. “Belqrano” üstünlüyü bir neçə dəfə əldən versə də, oyunun son hissəsində vurduğu qolla tarixi qələbəni rəsmiləşdirdi.
Bu nəticə Argentina futbolunda son illərin ən böyük sürprizlərindən biri kimi qiymətləndirilir. Ekspertlər artıq “Belqrano”nun uğurunu “Lester”in İngiltərə Premyer Liqasındakı çempionluğu ilə müqayisə etməyə başlayıblar.
