Formula 1 tarixində ən emosional qələbələrdən biri 2024-cü il mayın 26-da Monakoda yaşanmışdı. “Ferrari” pilotu Şarl Lekler doğma şəhərində keçirilən Monako Qran-prisinin qalibi olaraq 93 illik uğursuz seriyanı bitirmişdi.
Monakolu sürücü finiş xəttini “McLaren” pilotu Oskar Piastridən 7,1 saniyədən çox öndə keçərək karyerasının ən xüsusi zəfərlərindən birinə imza atmışdı. Həmin yarışda üçüncü yeri isə Leklerin komanda yoldaşı Karlos Sayns tutmuşdu.
Bu nəticə Monako motorsport tarixi üçün də xüsusi əhəmiyyət daşıyırdı. Çünki knyazlıq təmsilçisi sonuncu dəfə 1931-ci ildə Lui Şironun qələbəsi ilə ev yarışını qazanmışdı.
Monakodakı “uğursuzluq lənəti” nəhayət qırıldı
Lekler üçün Monako yarışı illərlə uğursuzluqlarla yadda qalmışdı. O, 2021-ci ildə sıralama turunda poul qazansa da, qəza səbəbindən əsas yarışa belə başlaya bilməmişdi. 2022-ci ildə isə lider olduğu yarışda komandanın taktiki səhvləri nəticəsində podiumdan kənarda qalmışdı.
2024-cü ildə isə hər şey fərqli oldu. Lekler şənbə günü keçirilən sıralama turunda 1:10.270 nəticə göstərərək poul mövqeyini qazandı. Bu, onun Monakoda üçüncü poul nəticəsi idi. Eyni zamanda “Ferrari” tarixində Formula 1 üzrə 250-ci poul kimi qeydə alınmışdı.
Yarışın startı dramatik başlamışdı. Serxio Peres, Kevin Maqnussen və Niko Hülkenberqin ilk dövrədə toqquşması qırmızı bayraqlara səbəb olmuşdu. Restartdan sonra ilk “10-luq” finişə startdakı düzülüşlə çatmış və bu, Formula 1 tarixində ilk belə hal olmuşdu.
Lekler: “Bu yarış uşaqlıq arzum idi”
Yarışdan sonra emosiyalarını gizlədə bilməyən Şarl Lekler Monakoda qalib gəlməyin onun üçün xüsusi anlam daşıdığını söyləmişdi:
“Bu yarış mənim Formula 1 sürücüsü olmaq arzumu formalaşdırmışdı. Son dövrələr emosional baxımdan çox çətin keçirdi. Sadəcə hər şeyin problemsiz bitməsini istəyirdim”.
Lekler çıxışında atasını da xatırlamışdı:
“Atamı çox düşünürdüm. Mənim burada yarışmağım üçün hər şeyi etmişdi. Monakoda qalib gəlmək bizim ortaq arzumuz idi”.
Hazırda “Ferrari”də Lyuis Hemiltonla birlikdə çıxış edən Lekler hələ də ilk dünya çempionluğu uğrunda mübarizəsini davam etdirir. Buna baxmayaraq, 2024-cü il Monako Qran-prisi onun karyerasının ən yaddaqalan anlarından biri olaraq qalır.
