Azərbaycan bu il beynəlxalq bilyard təqvimində mühüm yer tutacaq. Paytaxt Bakı yay aylarında Avropanın ən güclü ustalarını bir araya gətirəcək iki böyük yarışa ev sahibliyi etməyə hazırlaşır.
Azərbaycan Bilyard Federasiyasının yaydığı məlumata görə, şəhərdə həm Avropa Kuboku, həm də sərbəst piramida növü üzrə Avropa çempionatı keçiriləcək. Hər iki turnir qitənin aparıcı bilyardçılarının iştirakı ilə təşkil olunacaq.
Veteranlar Avropa Kubokunda yarışacaq
İlk yarış Avropa Kuboku olacaq. Turnir iyulun 5-dən 8-dək keçiriləcək və burada yaşı 40-dan yuxarı olan idmançılar mübarizə aparacaqlar. Təcrübəli bilyardçılar qitənin ən nüfuzlu kuboklarından biri uğrunda yarışacaqlar.
Yarışın Bakıda təşkili ölkədə bu idman növünə marağın artmasına və beynəlxalq əlaqələrin genişlənməsinə əlavə töhfə verəcək.
Qitə çempionatı da paytaxtda təşkil olunacaq
Avropa Kubokunun başa çatmasından dərhal sonra sərbəst piramida üzrə Avropa çempionatı start götürəcək. İyulun 8-dən 12-dək davam edəcək yarışda müxtəlif ölkələrdən olan güclü idmançılar iştirak edəcəklər.
Hər iki turnir “Strike for Glory!” şüarı altında keçiriləcək. Yarışların təşkilinə Azərbaycan Gənclər və İdman Nazirliyi, Azərbaycan Bilyard Federasiyası və Avropa Piramida Federasiyası dəstək verir.
