Norveç milli futbol komandası 2026-cı il dünya çempionatı öncəsi hazırladığı qeyri-adi fotosessiya ilə sosial şəbəkələrdə böyük maraq doğurub. Komandanın futbolçuları qədim skandinav döyüşçülərini xatırladan geyimlərdə, qalxan və qılınclarla obyektiv qarşısına keçərək ölkənin tarixi irsinə diqqət çəkiblər.
Milli komandanın rəsmi platformalarında yayımlanan görüntülərdə Norveç futbolunun əsas simaları, o cümlədən Erlinq Haaland və digər tanınmış oyunçular vikinq motivləri əsasında qurulmuş dekorasiyalar fonunda təqdim olunublar. Fotosessiya qısa müddətdə geniş müzakirələrə səbəb olub və azarkeşlər tərəfindən müsbət qarşılanıb.
Norveç yığması 1998-ci ildən sonra ilk dəfə FIFA Dünya Çempionatının final mərhələsində iştirak edəcək. Komanda seçmə mərhələdə nümayiş etdirdiyi sabit və uğurlu çıxış sayəsində uzun fasiləyə son qoyub.
Erlinq Haalandın liderlik etdiyi hücum xətti və kapitan Martin Edeqorun rəhbərliyi altında Norveç seçmə oyunlarını maksimum nəticə ilə başa vuraraq qrupunu birinci pillədə tamamlayıb. Skandinaviya təmsilçisi Avropanın ən yaxşı formada olan komandalarından biri kimi mundiala yollanır.
Tarixi uğurun davamı hədəflənir
Norveç üçün bu, dünya çempionatları tarixində cəmi dördüncü iştirak olacaq. Komandanın ən uğurlu nəticəsi 1998-ci ildə qeydə alınıb. Həmin turnirdə norveçlilər 1/8 final mərhələsinə qədər irəliləsələr də, sonradan İtaliyaya məğlub olaraq mübarizəni dayandırmışdılar.
İndi isə ölkə futbolunda yeni nəslin formalaşması fonunda azarkeşlər komandanın daha böyük uğura imza atacağına inanırlar. Dünya çempionatı öncəsi hazırlanan vikinq konseptli fotosessiya da məhz bu inamı və milli ruhu nümayiş etdirən simvolik addım kimi qiymətləndirilir.
