“Vest Hem” yay transfer dönəmində komandanın əsas oyunçularından biri olan Mateuş Fernandeşi itirmək niyyətində deyil. Məşhur insayder Fabrizio Romanonun yaydığı məlumata görə, London klubu 21 yaşlı portuqaliyalı yarımmüdafiəçi üçün 85 milyon funt sterlinq tələb edir.
Bildirilir ki, “çəkicdöyənlər” Premyer Liqanı tərk etmələrinə baxmayaraq, Fernandeşi komandanın gələcəyi üçün vacib fiqur hesab edir və yalnız çox yüksək təklif qarşılığında onunla yollarını ayırmağa hazırdır.
Avropa nəhəngləri futbolçunun arxasındadır
Mateuş Fernandeş son mövsümdəki çıxışı ilə bir sıra aparıcı klubların diqqətini cəlb edib. Məlumata görə, futbolçu ilə “Arsenal” və PSJ yanaşı, “Çelsi” və Madrid “Real”ı da yaxından maraqlanır.
Portuqaliyalı yarımmüdafiəçi gənc yaşına baxmayaraq, meydanın müxtəlif zonalarında faydalı çıxışı ilə seçilir. Onun həm müdafiə, həm də hücum xəttində effektiv oynaması transfer bazarında dəyərinin sürətlə artmasına səbəb olub.
Klubların marağı fonunda “Vest Hem” rəhbərliyi oyunçunun qiymətini maksimum səviyyədə saxlamağa çalışır. 85 milyon funtluq tələb də məhz bu strategiyanın bir hissəsi kimi qiymətləndirilir.
Mateuş Fernandeş 2025/26 mövsümündə bütün turnirlər daxil olmaqla 42 oyunda forma geyinib. O, bu görüşlərdə 5 qol vurub və 5 məhsuldar ötürmə ilə yadda qalıb.
Hazırda Transfermarkt portalında futbolçunun bazar dəyəri 50 milyon avro göstərilsə də, “Vest Hem” onu daha aşağı məbləğə satmaq niyyətində deyil. Bu səbəbdən yay transfer pəncərəsinin ən maraqlı transfer hekayələrindən birinin məhz Fernandeş ətrafında yaşanacağı gözlənilir.
