Azərbaycan boks yığması növbəti reytinq xarakterli Dünya Kubokunda iştirak edəcək. İyunun 15-də Çinin Quyyan şəhərində start götürəcək nüfuzlu yarışda ölkəmizi həm təcrübəli, həm də perspektivli idmançılardan ibarət heyət təmsil edəcək.
Bir həftə davam edəcək turnir beynəlxalq reytinq baxımından böyük əhəmiyyət daşıyır. Yarışda qazanılacaq nəticələr boksçuların dünya sıralamasındakı mövqelərinə birbaşa təsir göstərəcək. Azərbaycan millisi son illərdə Dünya Kuboku mərhələlərində əldə etdiyi uğurları davam etdirməyə çalışacaq.
Kişilərdən ibarət yığmanın baş məşqçisi Ravşan Xocayev Quyyandakı yarış üçün səkkiz idmançıya güvənib.
Azərbaycanı aşağıdakı boksçular təmsil edəcəklər:
- Sübhan Məmmədov (50 kq)
- Amin Məmmədzadə (55 kq)
- Məhəmmədəli Aşırəliyev (60 kq)
- Malik Həsənov (65 kq)
- Nəbi İsgəndərov (70 kq)
- Səidcəmşid Cəfərov (75 kq)
- Murad Allahverdiyev (80 kq)
- Alfonso Dominqes (90 kq)
Hazırda Qazaxıstanın Çimkənd şəhərində təlim-məşq toplanışında olan milli komanda birbaşa oradan Çinə yola düşəcək. Turnirin püşkatma mərasimi isə iyunun 14-də keçiriləcək.
Azərbaycan boksçuları cari ilin əvvəlində Braziliyada təşkil olunan Dünya Kubokunda uğurlu çıxış etmişdilər. Yığma həmin yarışda 3 qızıl və 1 bürünc medal qazanaraq komanda hesabında diqqətçəkən nəticəyə imza atmışdı. Quyyandakı turnir isə milli üçün növbəti ciddi sınaq olacaq.
