2026-cı il dünya çempionatında E və F qruplarının ilk turunda keçirilən növbəti oyunlar fərqli ssenarilərlə yadda qalıb. Kot-d’İvuar Ekvador üzərində son dəqiqə qolu ilə qələbə qazanıb, İsveç isə Tunisə qarşı inamlı çıxış edərək böyükhesablı qələbəyə sevinib.
Diallo Afrika təmsilçisinə üç xal qazandırdı
Filadelfiyadakı “Lincoln Financial Field” stadionunda keçirilən Kot-d’İvuar – Ekvador qarşılaşması uzun müddət qolsuz davam edib. Hər iki komanda ehtiyatlı oyun nümayiş etdirsə də, görüşün taleyi son dəqiqələrdə həll olunub.
Matçın qəhrəmanı Amad Diallo olub. Hücumçu 90-cı dəqiqədə fərqlənərək komandasına vacib qələbə qazandırıb. Ekvador buraxdığı qoldan sonra hesabı bərabərləşdirməyə çalışsa da, vaxt buna imkan verməyib və qarşılaşma Kot-d’İvuarın 1:0 hesablı üstünlüyü ilə başa çatıb.
DÇ-2026, E qrupu, I tur
Kot-d’İvuar – Ekvador – 1:0
Qol: Diallo, 90
Bu nəticədən sonra Afrika təmsilçisi E qrupunda ikinci pilləyə yüksəlib. Qrupun digər matçında Almaniya Kurasaonu 7:1 hesabı ilə məğlub edib.
İsveç hücum futbolu ilə seçildi
Monterreydəki “Estadio BBVA” arenasında keçirilən İsveç – Tunis oyunu isə bol qollu keçib. Skandinaviya təmsilçisi rəqibini 5:1 hesabı ilə məğlub edərək mundiala möhtəşəm başlanğıc edib.
İsveç yığmasının heyətində Yasın Ayari iki dəfə fərqlənib. Aleksander İsak bir qol və iki məhsuldar ötürmə ilə komandasının qələbəsində mühüm rol oynayıb. Viktor Dyökereş də bir qol vurub və bir assist müəllifi olub. Tunisin yeganə qolunu isə Rekik vurub.
Görüş boyu üstün görünən İsveç həm hücumda, həm də topa nəzarətdə rəqibini geridə qoyaraq F qrupunda liderliyə yüksəlib.
DÇ-2026, F qrupu, I tur
İsveç – Tunis – 5:1
Qollar: Ayari, 7, 90+6; İsak, 30; Dyökereş, 59; Svanberq, 84 – Rekik, 43
Bu qələbə sayəsində İsveç ilk turdan sonra qrupun zirvəsinə yerləşib. Digər görüşdə Niderland və Yaponiya 2:2 hesablı heç-heçə ediblər.
