Azərbaycan taekvondoçuları Bosniya və Herseqovinada təşkil olunan “Bosnia Open” beynəlxalq turnirində uğurlu nəticələr əldə ediblər. Müxtəlif yaş kateqoriyalarında çıxış edən idmançılarımız yarışda ümumilikdə yeddi medal qazanaraq ölkəmizi layiqincə təmsil ediblər.
Turnirdə Azərbaycan Taekvondo Federasiyasına bağlı müxtəlif klubların yeniyetmə və gənc üzvləri mübarizə aparıblar. Yarışın yekununda komandamızın hesabına bir qızıl, iki gümüş və dörd bürünc medal yazılıb.
Ən yüksək nəticəni gənclər arasında +78 kq çəki dərəcəsində mübarizə aparan Allahverdi Məmmədov göstərib. “Atlet” Taekvondo Klubunun təmsilçisi bütün rəqiblərinə qalib gələrək fəxri kürsünün ən yüksək pilləsinə qalxıb.
Yeniyetmələr arasında çıxış edən Aliyə Məmmədli (+59 kq, “Altay” TK) və Sadiq Məmmədzadə (53 kq, “Alpman” TK) finala qədər irəliləyərək gümüş medala sahib olublar.
Bürünc mükafat qazanan idmançılar isə Zəhra Vəliyeva (59 kq, gənclər, “Asiman” TK), Sübhan Rzayev (41 kq, yeniyetmələr, “Alpman” TK), Məhəmməd Bağırov (33 kq, yeniyetmələr, DGK İSM) və Rəsul İsmayılov (59 kq, gənclər, DGK İSM) olublar.
Bosniyada əldə edilən nəticələr Azərbaycan taekvondosunun gənc nəsildəki potensialını bir daha nümayiş etdirib. Xüsusilə yeniyetmə və gənc idmançıların beynəlxalq arenada qazandığı medallar gələcək yarışlar üçün də müsbət siqnal hesab olunur.
