“Mançester Siti” yay transfer bazarının ən səs-küylü keçidlərindən birini reallaşdırmağa yaxınlaşıb. Premyer Liqa nəhəngi “Nottingem Forest”in yarımmüdafiəçisi Elliot Andersonu heyətinə qatmaq üçün danışıqları sürətləndirib və yaxın günlərdə yeni rəsmi təklif göndərməyə hazırlaşır.
İngiltərə çempionunun rəhbərliyi 23 yaşlı futbolçunu gələcək layihənin vacib hissələrindən biri hesab edir. Bu səbəbdən klub əvvəlki təkliflə kifayətlənmək niyyətində deyil və transferi yekunlaşdırmaq üçün daha böyük maliyyə paketi hazırlayıb. Məlumata görə, söhbət 135-140 milyon avro arasında dəyişən məbləğdən gedir ki, bu da transfer baş tutacağı halda “Mançester Siti” tarixinin ən bahalı keçidi olacaq.
Andersonun özü də karyerasında yeni addım atmağa müsbət yanaşır. Bildirilir ki, futbolçu ilə şəxsi müqavilənin əsas detalları artıq razılaşdırılıb. Tərəflər arasında nəzərdə tutulan anlaşma 2031-ci ilin yayına qədər qüvvədə olacaq.
Bundan əvvəl mançesterlilər bonuslarla birlikdə təxminən 106 milyon funt sterlinqlik təklif irəli sürsələr də, “Nottingem Forest” rəhbərliyi daha yüksək məbləğ tələb edib. Hazırda danışıqların əsas mərhələsi məhz transfer haqqı üzərində cəmləşib.
Anderson son mövsümdə göstərdiyi sabit performansla Premyer Liqanın diqqət çəkən yarımmüdafiəçilərindən birinə çevrilib. “Siti”nin məşqçilər korpusu onun həm müdafiə, həm də hücum xəttində oynamaq bacarığını komandanın oyun fəlsəfəsinə uyğun hesab edir.
