Beynəlxalq Gimnastika Federasiyası (World Gymnastics) mükafatlandırma mərasimlərində idmançıların davranışına dair qaydaları yeniləyib. Təşkilatın qəbul etdiyi dəyişikliklər podium üzərində siyasi, dini və irqi məzmunlu hərəkətlərin qarşısını almağa yönəlib və qayda pozuntularına görə daha sərt cəzalar nəzərdə tutur.
Yeni qaydalar federasiyanın etik davranış standartlarını gücləndirməyi və beynəlxalq yarışlarda neytrallıq prinsipini qorumağı hədəfləyir. Bununla əlaqədar sənədə iki yeni maddə əlavə olunub.
Yenilənmiş 13-cü maddəyə əsasən, mükafatlandırma mərasimləri zamanı aşağıdakı hərəkətlər qadağan olunur:
- Siyasi, dini və ya irqi təbliğat aparmaq
- Bu məzmunu daşıyan simvol, nişan, banner və yazıları nümayiş etdirmək
- Siyasi və ya dini mesajlı geyimlərdən istifadə etmək
- Müvafiq məzmunlu jestlər göstərmək
- World Gymnastics tərəfindən təsdiqlənmiş rəsmi milli bayraqlardan başqa digər bayraqları nümayiş etdirmək
Federasiya hesab edir ki, bu məhdudiyyətlər idmanın siyasi və ideoloji təsirlərdən uzaq saxlanılmasına kömək edəcək.
Sənədə əlavə edilən 14-cü maddədə qeyd olunur ki, yuxarıda sadalanan qadağaların pozulması ciddi intizam pozuntusu hesab ediləcək. Belə hallarda idmançılar aşağıdakı sanksiyalarla üzləşə bilərlər:
- Diskvalifikasiya
- Yarış nəticələrinin ləğvi
- Medal və titulların geri alınması
Bundan əlavə, milli federasiyalar da öz idmançılarının davranışına görə məsuliyyət daşıyacaqlar. Qayda pozuntuları aşkar edilərsə, federasiyalar həm intizam, həm də maliyyə xarakterli cəzalarla qarşılaşa bilərlər.
Yeni dəyişikliklərin beynəlxalq gimnastika yarışlarında vahid davranış standartlarının formalaşdırılmasına xidmət edəcəyi bildirilir.
