NBA-də yay transfer dövrünün ən diqqətçəkən sövdələşmələrindən biri reallaşıb. Tanınmış insayder Şəms Çaraniyanın məlumatına görə, “Charlotte Hornets”in ulduz oyun qurucusu LaMelo Boll karyerasını “Minnesota Timberwolves”də davam etdirəcək. Mübadilə həm heyət quruluşu, həm də gələcək draft seçimləri baxımından liqanın son illərdəki ən iri əməliyyatlarından biri hesab olunur.
“Minnesota” heyətini ulduz oyun qurucu ilə gücləndirdi
Razılaşmaya əsasən, “Minnesota” LaMelo Boll və Coş Qrini heyətinə qatır. Əvəzində “Charlotte” Naz Rid, 2033-cü ilin qorunmayan birinci raund draft seçimi, 2028, 2029 və 2030-cu illər üçün birinci raund seçimlərinin dəyişdirilməsi hüququ, həmçinin 2029, 2032 və 2033-cü illərin ikinci raund seçimlərini əldə edəcək.
Bu keçiddən sonra “Timberwolves”in arxa xəttində LaMelo Boll və Entoni Edvards tandemi formalaşacaq. Klub rəhbərliyi hesab edir ki, iki yüksək səviyyəli hücumçunun birgə çıxışı komandanın çempionluq iddiasını gücləndirə bilər. Bununla yanaşı, mütəxəssislər Naz Ridin gedişindən sonra ön xətdə yaranacaq boşluğun necə doldurulacağını da diqqətlə izləyirlər.
Boll yeni komandasında böyük gözləntilərlə çıxış edəcək
24 yaşlı basketbolçu ötən mövsüm 72 oyunda iştirak edərək orta hesabla 20,4 xal, 4,8 ribaund və 7,1 məhsuldar ötürmə ilə yadda qalıb. Son illərdə zədələr səbəbindən müəyyən fasilələr yaşasa da, sağlam mövsüm keçirməsi onun bazar dəyərini yenidən artırıb.
Basketbol ekspertləri hesab edirlər ki, LaMelo Bollun “Minnesota”ya keçidi komandanın hücum potensialını xeyli artıracaq. Eyni zamanda “Charlotte” gələcək draft aktivləri hesabına heyətini yenidən formalaşdırmaq üçün geniş imkan əldə edib. Bu mübadilənin növbəti mövsümdə hər iki klubun strategiyasına ciddi təsir göstərəcəyi gözlənilir.
