Argentina millisinin kapitanı Lionel Messi dünya çempionatları tarixində indiyədək heç bir futbolçunun bacarmadığı nailiyyətə imza atıb. Təcrübəli hücumçu DÇ-2026-nın qrup mərhələsinin son turunda İordaniya ilə oyunda vurduğu qolla mundiallarda ardıcıl yeddi qarşılaşmada fərqlənən ilk futbolçu kimi tarixə düşüb.
Messi bununla həm öz rekordunu yeniləyib, həm də uzun illər toxunulmaz hesab olunan dünya çempionatı göstəricilərini geridə qoyub. O, DÇ-2022-də başladığı məhsuldar seriyanı 2026-cı il turnirində də davam etdirərək ardıcıl yeddi oyunda rəqib qapılarına yol tapıb.
Ardıcıl yeddi oyunda qol vuran ilk futbolçu
Messinin rekord seriyası Qətərdə keçirilən 2022-ci il dünya çempionatının pley-off mərhələsində başlayıb. O, Avstraliya, Niderland, Xorvatiya və Fransa ilə görüşlərdə qol vurduqdan sonra, DÇ-2026-da Avstriya, Əlcəzair və İordaniya ilə matçlarda da fərqlənərək seriyanı yeddi oyuna çatdırıb.
Lionel Messinin dünya çempionatlarında qol seriyası (7 oyun)
- 2026 – İordaniya – qol
- 2026 – Avstriya – dubl
- 2026 – Əlcəzair – het-trik
- 2022 – Fransa – dubl
- 2022 – Xorvatiya – qol
- 2022 – Niderland – qol
- 2022 – Avstraliya – qol
Dünya çempionatlarının ən uzun qol seriyaları
Bu göstərici ilə Messi mundial tarixində ən uzun məhsuldar oyun seriyasının yeganə sahibinə çevrilib. O, altı oyunluq seriyaya malik Fransa əfsanəsi Jüst Fonten və Braziliya millisinin sabiq hücumçusu Jairzinyonu geridə qoyub.
Dünya çempionatlarında ən uzun qol seriyasına malik futbolçular:
- 7 – Lionel Messi (Argentina)
- 6 – Jüst Fonten (Fransa)
- 6 – Jairzinyo (Braziliya)
- 5 – Gerd Müller (AFR)
- 5 – Eyzebio (Portuqaliya)
- 5 – Leonidas (Braziliya)
- 5 – Kareka (Braziliya)
- 5 – Teofilo Kubilyas (Peru)
- 5 – Helmut Ran (AFR)
- 5 – Layoş Tixi (Macarıstan)
- 5 – Xames Rodriges (Kolumbiya)
- 5 – Dyördy Şaroşi (Macarıstan)
- 5 – Xristo Stoiçkov (Bolqarıstan)
- 5 – Rivaldo (Braziliya)
- 5 – Salvatore Skillaçi (İtaliya)
Messi DÇ-2026-da da yüksək məhsuldarlığını davam etdirərək Argentinanın qrup mərhələsini maksimum nəticə ilə başa vurmasına mühüm töhfə verib. Təcrübəli hücumçunun rekord seriyasını pley-off mərhələsində də artırmaq imkanı var və o, mundial tarixində yeni rekordlar müəyyənləşdirməyə davam edir.
