İngiltərənin “Mançester Siti” klubu yay transfer pəncərəsinin ən səs-küylü keçidlərindən birini rəsmiləşdirib. The Times qəzetinin məlumatına görə, “şəhərlilər” “Nottingem Forest”in yarımmüdafiəçisi Elliot Andersonun transferi üçün 116 milyon funt sterlinq ödəməyə razılaşıb. Bu, həm klubun, həm də Britaniya futbolunun tarixində rekord göstəricilərdən biri hesab olunur.
Məlumata əsasən, 23 yaşlı futbolçu tibbi müayinədən uğurla keçib və “Mançester Siti” ilə beş illik müqavilə imzalayıb. Hazırda İngiltərə millisinin heyətində 2026-cı il dünya çempionatında çıxış edən Anderson turnir başa çatdıqdan sonra İngiltərəyə qayıdaraq transferin bütün rəsmi prosedurlarını tamamlayacaq.
Qrilişin rekordunu geridə qoydu
Bu transfer “Mançester Siti”nin tarixində yeni rekord müəyyənləşdirib. Klubun əvvəlki ən bahalı alış-verişi 2021-ci ildə “Aston Villa”dan 100 milyon funt sterlinq qarşılığında transfer olunan Cek Qriliş idi. Elliot Anderson üçün ödənilən 116 milyon funt isə bu göstəricini geridə qoyaraq klubun transfer tarixində yeni zirvə yaradıb.
Qeyd edək ki, Anderson 2024-cü ildə “Nyukasl Yunayted”dən “Nottingem Forest”ə keçmiş, burada uğurlu çıxışı sayəsində həm İngiltərə millisinin əsas heyətinə yüksəlmiş, həm də Avropanın aparıcı klublarının diqqətini cəlb etmişdi. Onun “Mançester Siti”yə keçidi klubun yeni baş məşqçisi Enzo Mareskanın rəhbərliyi altında ilk böyük transferlərdən biri kimi qiymətləndirilir.
