Belçika Futbol Assosiasiyası (RBFA) ABŞ millisinin hücumçusu Folarin Baloqunun DÇ-2026-nın 1/8 finalında iştirakına icazə verən qərarla bağlı FİFA-ya göndərdiyi müraciətdən sonra rəsmi açıqlama yayıb. Qurum bildirib ki, təşkilatın cavabı hüquqi prosedurlarla bağlı ciddi suallar yaradıb və buna görə məsələni mübahisələndirmək niyyətindədir.
RBFA-nın məlumatına görə, federasiya əvvəlcə FİFA-dan Baloqunun avtomatik cəzasının niyə ləğv edildiyini izah edən qərarın surətini və tətbiq olunan prosedur barədə məlumat istəyib. Lakin qurumun iddiasına əsasən, bu sorğu FİFA tərəfindən birbaşa apellyasiya kimi qiymətləndirilib və Belçika tərəfinə cəmi bir neçə saat ərzində sənədləri tamamlamaq tələbi göndərilib. Daha sonra isə həmin apellyasiya qəbuledilməz elan olunub.
RBFA: “Qanuni izahat almaq istəyirdik”
Belçika Futbol Assosiasiyası hesab edir ki, FİFA öz qaydalarına zidd hərəkət edib. Qurumun bəyanatında bildirilir:
“Əslində RBFA yalnız qanuni izahat almaq istəyirdi. Lakin FİFA özü apellyasiya üçün əsas yaratdı və dərhal onun qəbuledilməz sayılmasını təmin etdi.”
RBFA əlavə edib ki, FİFA eyni vaxtda federasiyanın yazılı və şifahi sorğularına cavab verməkdən imtina edib. Bundan başqa, matçöncəsi koordinasiya iclasında əvvəlki oyunlardan fərqli olaraq avtomatik diskvalifikasiya qaydaları ilə bağlı bölmənin təqdimatdan çıxarıldığı da vurğulanıb. Belçika tərəfi bunun səbəbini dəfələrlə soruşsa da, cavab almadığını bildirib.
Federasiya bəyan edib ki, hazırkı vəziyyətdə FİFA-dan nə əsaslandırılmış qərar, nə də rəsmi izahat alıb. Buna görə də RBFA Baloqunun ABŞ – Belçika qarşılaşmasında oynamaq hüququna etiraz etməyə davam edəcəyini açıqlayıb.
Bəyanatın sonunda isə vurğulanır ki, matçın nəticəsindən asılı olmayaraq, təşkilat etik prinsiplərin, ədalətli rəqabətin və futbolun maraqlarının qorunması naminə hüquqi mübarizəni davam etdirəcək.
