Yaponiya millisinin və NBA-nın tanınmış forvardı Rui Haçimura karyerasını Los Angeles Clippers klubunda davam etdirəcək. ESPN-in yaydığı məlumata görə, 28 yaşlı basketbolçu Kaliforniya təmsilçisi ilə iki illik, ümumi dəyəri 28 milyon dollar olan müqaviləyə razılıq verib.
Haçimura azad agent statusu aldıqdan sonra meneceri Darren Matsubara ilə birlikdə “Clippers”lə danışıqlara başlayıb. Tərəflər əvvəlcə Los Angeles Lakers klubu ilə “sign-and-trade” variantını reallaşdırmağa çalışsalar da, bu razılaşma baş tutmayıb. Bundan sonra basketbolçu birbaşa “Clippers”ə keçid etmək qərarı verib və Los-Ancelesdə qalmaq istəyini gerçəkləşdirib.
Haçimura digər təkliflərdən imtina edib
Məlumata görə, Rui Haçimura Golden State Warriors, Minnesota Timberwolves, Brooklyn Nets və San Antonio Spurs klublarından gələn təklifləri qəbul etməyib. Basketbolçunun əsas məqsədi Los-Ancelesdə qalmaq və məhz “Clippers”in formasını geyinmək olub.
“Lakers” və “Clippers” rəhbərliyi arasında oyunçunun keçidi ilə bağlı danışıqlar aparılsa da, draft seçimləri və maliyyə şərtləri üzrə fikir ayrılığı səbəbindən razılıq əldə olunmayıb.
Ötən mövsüm Haçimura müntəzəm çempionatda 11,5 xal, 51,4 faiz dəqiq atış və üç xallıq zərbələrdə 44,3 faiz göstərici ilə yadda qalıb. Pley-off mərhələsində isə onun performansı daha da yüksəlib. Yaponiyalı forvard hər oyunda orta hesabla 17,5 xal toplayıb, meydandan 54,9 faiz, üç xallıq atışlarda isə 56,9 faiz dəqiqlik nümayiş etdirərək ən azı beş uzaq məsafəli cəhd edən basketbolçular arasında 2026-cı il pley-offunun ən yüksək göstəricisinə sahib olub.
2019-cu il NBA Draftında 9-cu seçim olan Haçimura 2023-cü ildə “Lakers”ə keçmiş, burada komandanın əsas rotasiya oyunçularından birinə çevrilmişdi. Onun yeni transferi “Clippers”in heyətini gücləndirməklə yanaşı, klubun digər transfer planları, o cümlədən məhdud azad agent Peyton Uotson uğrunda mübarizəsini davam etdirməsinə də imkan yaradır.
