Dünya futbolunda növbəti prezident seçkilərinə hələ aylar qalsa da, FIFA rəhbərliyi ətrafında gərginlik artıq artmağa başlayıb. Müstəqil jurnalist Romen Molina bildirib ki, UEFA daxilində Canni İnfantinoya qarşı 2027-ci il prezident seçkilərində real rəqib irəli sürmək üçün məsləhətləşmələr aparılır. Hələlik bu məlumat rəsmi təsdiqini tapmasa da, son hadisələr Avropa futbol rəhbərlərinin narazılığını daha da gücləndirib.
Balogun qərarı narazılığı artırdı
UEFA ilə FIFA arasında münasibətləri gərginləşdirən əsas səbəblərdən biri ABŞ millisinin hücumçusu Folarin Baloqunun qırmızı vərəqədən sonra cəzasının ləğv edilməsi oldu. Bu qərar sayəsində futbolçu dünya çempionatının 1/8 finalında Belçikaya qarşı meydana çıxdı.
ABŞ Prezidenti Donald Tramp sonradan açıqlamasında bu məsələyə müdaxilə etdiyini gizlətməyib:
“Mənə dedilər ki, komandamızın ən yaxşı futbolçusu növbəti oyunda iştirak edə bilməyəcək. Mən bunun turnir üçün böyük problem olacağını düşündüm.”
Bundan sonra Trampın Canni İnfantino ilə telefon danışığı etdiyi məlum oldu. FIFA isə qərarın müstəqil intizam orqanı tərəfindən qəbul edildiyini bildirsə də, Belçika Futbol Assosiasiyası və UEFA bunun turnirin ədalət prinsipinə zidd olduğunu bəyan etdilər.
UEFA-nın sərt bəyanatında qeyd olunurdu:
“Baloqunun diskvalifikasiyasının ləğvi ilə qırmızı xətt keçildi. Qaydaların dəyişdirilməsi oyunun bütövlüyünə və turnirə olan etimada zərbə vurur.”
İnfantinonu məğlub etmək niyə çətindir?
Buna baxmayaraq, UEFA-nın istəyini həyata keçirməsi asan görünmür. FIFA prezidenti 211 milli assosiasiyanın səsi ilə seçilir və təkcə Avropa konfederasiyasının dəstəyi kifayət etmir.
Hazırkı vəziyyətdə İnfantinonun üstünlüyünü artıran əsas amillər bunlardır:
- Afrika, Asiya və Cənubi Amerika konfederasiyalarının rəhbərliyi artıq onun növbəti prezidentlik müddətini dəstəklədiyini açıqlayıb;
- FIFA-nın üzv assosiasiyalarının inkişafı üçün 2027–2031-ci illər dövründə 2,7 milyard dollar ayrılması planlaşdırılır;
- Son iki prezident seçkisində (2019 və 2023) İnfantinonun ümumiyyətlə rəqibi olmayıb.
Növbəti FIFA prezident seçkiləri 18 mart 2027-ci ildə keçiriləcək, namizədlərin qeydiyyatı isə 18 noyabr tarixində başa çatacaq.
Hazırda UEFA daxilində alternativ namizəd üzərində iş aparıldığı bildirilsə də, İnfantinonun geniş beynəlxalq dəstəyi nəzərə alınarsa, onu vəzifədən uzaqlaşdırmaq kifayət qədər mürəkkəb görünür. Bununla belə, qarşıdakı aylarda yeni qalmaqalların baş verməsi seçkiöncəsi vəziyyətə ciddi təsir göstərə bilər.
