Avropa futbolu 2026-cı ilin yay transfer pəncərəsində daha bir ulduzunu itirdi. Polşa millisinin əfsanəvi hücumçusu Robert Levandovski “Barselona” ilə müqaviləsinin bitməsindən sonra karyerasını ABŞ-da davam etdirmək qərarına gəldi və “Çikaqo Fayr”la anlaşdı. Onun həyat yoldaşı Anna bu addımı “həyəcanverici olmaqla yanaşı, qorxulu qərar” kimi dəyərləndirdi. Bəs bu transferin arxasında hansı səbəblər dayanır?
“Barselona”ya hörmət amili
Levandovski özü açıq şəkildə bildirib ki, “Barselona”dan sonra Avropada başqa klubda çıxış etməyi təsəvvür etmirdi. Onun sözlərinə görə, Kataloniya klubunda keçirdiyi illər ona güclü emosional bağlılıq yaradıb və növbəti addımın Avropadan kənarda olması daha məntiqli görünürdü.
Bu yanaşma onun “Bavariya”dan ayrılığından fərqli idi. Münhendə səkkiz il oynayan Levandovski klub rəhbərliyi ilə yaşanan problemlər səbəbindən ayrılmışdı. “Barselona”da isə ayrılıq qarşılıqlı anlaşma ilə baş verdi: klub maliyyə baxımından əvvəlki şərtləri qoruyub saxlaya bilmirdi, futbolçu isə bunu anlayışla qarşılayaraq yeni çağırışa açıq idi.
Ailə və adaptasiya çətinliyi
Bu qərarın ən çətin tərəfi ailə məsələsi oldu. Levandovskinin həyat yoldaşı Anna Barselonada qurduqları həyatdan razı idi. Orada sosial çevrəsi formalaşmış, biznesini inkişaf etdirmiş və övladlarının yeni mühitə uyğunlaşmasını təmin etmişdi.
ABŞ-a köç isə yeni məktəb, yeni dil və sosial mühit deməkdir. Anna bu prosesi “ana olaraq böyük təzyiq” kimi xarakterizə edib. Bununla belə, qərar düşünülmüş şəkildə verilib. Məlumata görə, Levandovskinin keçmiş komanda yoldaşları – Bastian Şvaynştayger və Tomas Müller onu bu addıma təşviq edənlər sırasında olub.
Şvaynştayger hətta ailə ilə də danışaraq Çikaqoda yaşayış şəraitinin kifayət qədər komfortlu olduğunu izah edib. Bundan əlavə, Levandovski ailəsinə söz verib ki, bu keçid yalnız qısamüddətli iş planıdır və müqavilə bitdikdən sonra onlar yenidən İspaniyaya qayıdacaqlar.
Polşa diasporunun rolu
Levandovskinin məhz “Çikaqo Fayr”ı seçməsində mühüm faktor Polşa diasporu olub. İllinoys ştatında ABŞ-ın ən böyük polyak icması yaşayır – təxminən 720 min nəfər. Çikaqo isə bu diasporun əsas mərkəzi sayılır.
Bu vəziyyət həm futbolçu, həm də klub üçün əlavə üstünlük yaradır. Yerli polyak icmasının Levandovskini yaxından izləyəcəyi gözlənilir ki, bu da klub üçün həm azarkeş bazasının genişlənməsi, həm də kommersiya gəlirlərinin artması deməkdir.
Maliyyə məsələləri
Maliyyə baxımından bu transfer Levandovski üçün geri addım sayıla bilər. “Barselona”da o, ildə təxminən 29,6 milyon dollar qazansa da, “Çikaqo Fayr”da onun əsas maaşı 10 milyon dollar civarındadır.
Bonuslarla bu məbləğ 15-20 milyon dollara qədər arta bilər. Buna baxmayaraq, “təmiz” qazanc əvvəlkindən aşağı olacaq. Futbolçu daha yüksək maaş təkliflərini Yaxın Şərqdən ala bilsə də, ailəsinin rahatlığını əsas götürərək ABŞ variantını seçib.
Ambisiyalı layihə və gələcək planlar
Levandovski transferdən əvvəl Çikaqoya səfər edərək klubun infrastrukturu və gələcək planları ilə tanış olub. Baş məşqçi Qreq Berhalterlə görüş onun komandada əsas rol oynayacağına inamını artırıb.
Klub rəhbərliyi isə futbolçunun yalnız meydanda deyil, həm də layihənin inkişafında vacib rol oynayacağını vurğulayıb. Levandovski özü də bildirib ki, uğurunu yalnız qollarla deyil, klubun bazar dəyərinə verdiyi töhfə ilə ölçəcək.
Bundan başqa, “Çikaqo Fayr”ın 2028-ci ildə istifadəyə verilməsi planlaşdırılan yeni stadionu da layihənin cəlbediciliyini artırır. Təxminən 750 milyon dollara başa gələcək arena müasir imkanları ilə seçiləcək və futbolçu karyerasının son mərhələsində burada çıxış edə bilər.
Levandovskinin bu qərarı həm idman, həm də şəxsi həyat baxımından ciddi çağırışdır. Onun MLS-də necə çıxış edəcəyi isə yaxın iki ildə məlum olacaq.
