Serbiyanın Loznitsa şəhərində keçirilən U-19 Avropa boks çempionatında Azərbaycan millisinin uğurlu çıxışı davam edir. Növbəti yarış günündə yığmamızın daha üç üzvü inamlı qələbələr qazanaraq 1/4 final mərhələsinə vəsiqə əldə edib. Bununla da oğlan boksçular arasında dörddəbir finala yüksələn Azərbaycan təmsilçilərinin sayı dördə çatıb.
Azərbaycan boksçuları qələbə seriyasını davam etdirir
55 kq çəki dərəcəsində çıxış edən Nihat Qasımov ikinci görüşündə çexiyalı Doryan Kropoq üzərində üçüncü raundda tam üstünlüklə qalib gələrək növbəti mərhələyə yüksəlib. O, yarımfinal uğrunda döyüşdə İngiltərə təmsilçisi Ruben Hujmannla qarşılaşacaq.
60 kq-da mübarizə aparan Əli Baxışov isə Xorvatiya boksçusu Petar Krpanı hakimlərin yekdil qərarı ilə 5:0 (30:27, 30:27, 30:27, 30:27, 30:27) hesabı ilə məğlub edib. Onun 1/4 finaldakı rəqibi Slovakiyadan olan Kristian Haraşik olacaq.
65 kq çəki dərəcəsində rinqə çıxan Şahin Aslanov gərgin keçən qarşılaşmada rusiyalı Muhammad Ali Seferbekov üzərində 3:2 (28:29, 29:28, 27:30, 30:27, 29:28) hesablı qələbə qazanaraq növbəti raunda adlayıb. Aslanov yarımfinala gedən yolda ingiltərəli Yaşua Flemminqlə üz-üzə gələcək.
Bununla Azərbaycan millisinin oğlanlardan ibarət heyətində 1/4 finala yüksələn idmançıların sayı dördə çatıb. Daha əvvəl 50 kq çəki dərəcəsində mübarizə aparan Əli Əliyev də bu mərhələyə vəsiqəni təmin etmişdi.
