3×3 basketbol üzrə “Neftçi SOCAR” Fransanın Bordo şəhərində keçirilən FIBA 3×3 Dünya Qadın Seriyasının növbəti mərhələsində mübarizəsini davam etdirir. Azərbaycan təmsilçisi turnirin 1/4 finalında İspaniya millisi ilə qarşılaşacaq.
“Neftçi SOCAR” qrup mərhələsində keçirdiyi iki oyundan birində qələbə qazanaraq pley-offa vəsiqə əldə edib. Komanda ilk qarşılaşmada İtaliya yığmasına 16:18 hesabı ilə məğlub olsa da, növbəti görüşdə Çilini 21:17 hesabı ilə üstələyərək yoluna davam edib.
İspaniya ilə həlledici görüş
“Neftçi SOCAR” – İspaniya 1/4 final qarşılaşması Bakı vaxtı ilə saat 21:25-də başlayacaq. Qalib komanda Bordo mərhələsində yarımfinala yüksələcək.
İspaniya “Neftçi SOCAR” üçün tanış rəqibdir. Azərbaycan klubu iyunda Fransanın Orlean şəhərində keçirilən Dünya Qadın Seriyasının mərhələsində də ispanlarla qarşılaşmış və 1/4 finalda 20:14 hesabı ilə qalib gəlmişdi. “Neftçi SOCAR” həmin turnirin finalında Fransa yığmasını 21:20 hesabı ilə məğlub edərək çempion olmuşdu.
Azərbaycan təmsilçisi ümumilikdə 2026-cı il Dünya Qadın Seriyasının ən iddialı komandalarından biri kimi çıxış edir. Mövsüm ərzində “Neftçi SOCAR” seriyanın iki mərhələsində qalib adını qazanıb.
Bordo turniri Dünya Qadın Seriyasının 2026-cı il təqvimində 21-ci mərhələdir. Mövsümün yekun turnirinin isə sentyabrın 5-6-da Şanxayda keçirilməsi nəzərdə tutulub.
