“Tottenhem” heyətini daha bir bahalı transferlə gücləndirib. London klubu “Mançester Siti”də çıxış edən 22 yaşlı braziliyalı cinah hücumçusu Savionun transferini rəsmən açıqlayıb.
Klublar müqavilənin maliyyə detallarını açıqlamasalar da, Britaniya mediasının məlumatına görə, “Tottenhem” futbolçu üçün ilkin olaraq 75 milyon funt sterlinq (təxminən 87,5 milyon avro) ödəyəcək.
Bonuslarla birlikdə transferin ümumi məbləği 85 milyon funta, yəni təxminən 99 milyon avroya çata bilər. Bu keçiddən sonra London klubunun yay transferlərinə çəkdiyi xərc 300 milyon funtu keçib.
Savio “Tottenhem”in ən bahalı transferlərindən oldu
Braziliyalının keçidi klub tarixinin ən böyük transferlərindən biridir. Maraqlıdır ki, “Tottenhem”in ən bahalı üç transferi məhz 2026/27 mövsümü ərəfəsində reallaşıb.
Klub tarixində ən yüksək məbləğ ödənilən futbolçular:
- 108 milyon avro – Sandro Tonali (“Nyukasl”, 2026/27)
- 99 milyon avro – Mateuş Fernandeş (“Vest Hem”, 2026/27)
- 87,7 milyon avro – Savio (“Mançester Siti”, 2026/27)
- 65 milyon avro – Xavi Simons (“RB Leypsiq”, 2025/26)
- 64,3 milyon avro – Dominik Solanke (“Bornmut”, 2024/25)
- 63,8 milyon avro – Məhəmməd Kudus (“Vest Hem”, 2025/26)
- 62 milyon avro – Tanqi Ndombele (“Lion”, 2019/20)
- 60 milyon avro – Yan Pol van Hekke (“Brayton”, 2026/27)
- 58 milyon avro – Rişarlison (“Everton”, 2022/23)
- 55 milyon avro – Brennan Conson (“Nottingem Forest”, 2023/24)
Savio yeni klubuna keçdikdən sonra məhz bu adla çıxış etmək istədiyini də bildirib. Futbolçu əvvəllər daha çox Savinyo adı ilə tanınırdı.
Savio 2024-cü ildə “Trua”dan “Mançester Siti”yə qoşulmuşdu. Bundan əvvəl “Jirona”da icarə əsasında keçirdiyi uğurlu mövsümlə diqqət çəkən braziliyalı İngiltərə klubunda iki mövsüm ərzində bütün turnirlərdə 84 matça çıxıb və 7 qol vurub.
