Joze Mourinyo 13 ildən sonra “Real Madrid”in baş məşqçisi kimi “Santyaqo Bernabeu”da yenidən meydana çıxacaq. Madrid klubu bu gün La Liqanın təxirə salınmış I turunun oyununda “Real Sosyedad”ı qəbul edəcək. Görüş Bakı vaxtı ilə saat 23:00-da başlayacaq. Qarşılaşma dünya çempionatının yarımfinal mərhələsində futbolçuları iştirak edən klublara əlavə vaxt verilməsi səbəbindən təxirə salınmışdı.
Mourinyo üçün matçın ayrıca simvolik əhəmiyyəti var. Portuqaliyalı mütəxəssis “Real”ın sükanı arxasında “Bernabeu”dakı son oyununu 2013-cü il iyunun 1-də keçirib. Həmin gün madridlilər “Osasuna”nı 4:2 hesabı ilə məğlub etmişdilər. Beləliklə, Mourinyo 13 ildən və 4835 gündən sonra Madrid klubunun baş məşqçisi kimi bu stadionda yenidən komandasını meydana çıxaracaq.
Mourinyo azarkeşlərdən komandaya dəstək istəyib
Mütəxəssis qarşılaşmadan əvvəl diqqətin onun qayıdışına deyil, futbolçulara yönəlməsini istəyib:
“Bernabeunun məni xüsusi şəkildə qarşılamasını istəmirəm. İstəyirəm ki, stadion komandanı – öz komandasını, öz ehtirasını qarşılasın. Ən vacib olan komandadır, mən önəmli deyiləm”.
Mourinyo həmçinin bunun mövsümdə keçiriləcək 19 ev oyunundan birincisi olduğunu vurğulayıb və hər xalın əhəmiyyət daşıdığını bildirib. Onun sözlərinə görə, “Real Sosyedad” öz oyun kimliyinə və keyfiyyətli futbolçulara malik rəqibdir və madridliləri çətin görüş gözləyir.
“Real Madrid” 2026/27 mövsümünə qələbə ilə başlayıb. Mourinyonun komandası səfərdə “Espanyol”u 2:1 hesabı ilə məğlub edib. Cud Bellinqem hesabı açıb, Karlos Espi isə matçın sonlarında qələbə qolunu vurub. “Real Sosyedad” isə ilk qarşılaşmasında “Betis”ə səfərdə 0:1 hesabı ilə uduzub.
Madridlilər mövsümün ilk ev qarşılaşmasında ikinci qələbələrini qazanmağa çalışacaqlar. Komandaların “Bernabeu”dakı son görüşü “Real Madrid”in 4:1 hesablı üstünlüyü ilə yekunlaşıb.
İspaniya çempionatı, I tur
- 23:00 — “Real Madrid” – “Real Sosyedad”
