“Mercedes” 2026-cı il Formula 1 mövsümünə dominant başlasa da, son yarışlarda “McLaren” və “Ferrari”nin sürətli inkişafı qüvvələr nisbətini dəyişib. Rəqiblərin bolidlərə gətirdiyi yeniliklər “Mercedes”in üstünlüyünü azaldıb və mübarizəni xeyli gərginləşdirib.
Komanda rəhbəri Toto Volfun sözlərinə görə, problem yeni detalların hazırlanmaması deyil. “Mercedes” 2026-cı il üçün 215 milyon dollarlıq büdcə limiti çərçivəsində xərclərini mövsüm boyunca bölüşdürməyi seçib və hazırda rəqiblərin tempində yenilik gətirmək üçün əlavə maliyyə imkanına malik deyil.
Volf “Mercedes”in strategiyasını izah etdi
“Hazırda bolidin təkmilləşdirilməsinə xərcləmək üçün pulumuz yoxdur. Mövsüm ərzində xərcləri bərabər bölüşdürməyə çalışırıq. Hesablamalarımız hansı mərhələdə daha böyük yeniliklərin gətirilə biləcəyinə və çempionat xallarının maksimumlaşdırılmasına əsaslanır”, – Volf bildirib.
Onun sözlərinə görə, Formula 1-də hazırda ciddi inkişaf yarışı gedir və aparıcı komandaların uğurlu yenilik paketi dövrə başına təxminən 0,1-0,2 saniyə üstünlük verə bilər. Bu səbəbdən “Mercedes” yeni komponentlərin tətbiqini gecikdirdikcə rəqiblər fərqi azaltmaq imkanı qazanırlar.
“Mercedes” W17 üçün son böyük yenilik paketini Kanada Qran-prisində təqdim edib, sonrakı mərhələlərdə isə əsasən daha kiçik dəyişikliklərlə kifayətlənib. “McLaren” isə son yeniliklərindən sonra ardıcıl iki Qran-pridə qələbə qazanaraq çempionat liderinə təzyiqi artırıb.
Volf hesab edir ki, “McLaren” və “Ferrari” xərclərin daha böyük hissəsini mövsümün indiki mərhələsinə yönəltmiş ola bilər. “Mercedes” rəhbəri bunun nəticəsinin ilin sonuna doğru görünəcəyini və rəqiblərin həmin vaxt eyni sürətlə yenilik gətirib-gətirə bilməyəcəyinin əsas suallardan biri olacağını vurğulayıb.
