UEFA Avropa Liqasının 2026/27 mövsümünün liqa mərhələsinin püşkatma mərasimi Monakoda keçirilib. Turnirdə mübarizə aparacaq 36 klub qarşıdakı mərhələdə üz-üzə gələcəyi səkkiz rəqibini öyrənib.
Bu, Avropa Liqasının 36 komandalı yeni formatda keçirilən üçüncü mövsümüdür. Bütün iştirakçılar vahid turnir cədvəlində yer alacaq. İlk səkkiz pilləni tutan komandalar birbaşa 1/8 finala yüksələcək, 9–24-cü yerlərin sahibləri isə pley-off mərhələsində mübarizə aparacaqlar.
“Benfika” və “Anderlext”in rəqibləri müəyyənləşdi
Portuqaliyanın “Benfika” klubu püşkatmaya birinci səbətdən qatılıb. Komandanın liqa mərhələsindəki rəqibləri AZ Alkmaar, “Milan”, “Seltik”, “Viktoriya Plzen”, “Lex”, “Omoniya”, OFİ və NEC Nijmegen olacaq.
Belçikanın “Anderlext” klubu isə ikinci səbətdə yer alıb. Brüssel təmsilçisi “Lion”, “Marsel”, “Zalsburq”, “Dinamo Zaqreb”, “Sanderlend”, “Yagelloniya”, “Hoffenhaym” və OFİ ilə qarşılaşacaq.
Püşkatma zamanı 36 klub UEFA reytinqinə əsasən hərəsində doqquz komanda olmaqla dörd səbətə ayrılıb. Xüsusi kompüter sistemi hər iştirakçı üçün hər səbətdən iki fərqli rəqib müəyyənləşdirib. Komandalar həmin rəqiblərdən biri ilə evdə, digəri ilə səfərdə oynayacaqlar.
Avropa Liqasının liqa mərhələsi sentyabrda başlayacaq
Hər komanda əsas mərhələdə səkkiz qarşılaşma keçirəcək – dördü evdə, dördü səfərdə. İlk turun oyunları 16–17 sentyabrda baş tutacaq.
Sonrakı turlar 15 və 22 oktyabr, 5 və 26 noyabr, 10 dekabr, 21 və 28 yanvar tarixlərində keçiriləcək. Liqa mərhələsinin son turunda bütün komandaların yekun mövqeləri müəyyənləşəcək.
Pley-off görüşləri 2027-ci il fevralın 18 və 25-də, 1/8 final qarşılaşmaları isə martın 11 və 18-də keçiriləcək. Avropa Liqasının 2026/27 mövsümünün finalı mayın 26-da Almaniyanın Frankfurt şəhərində baş tutacaq.
