“McLaren” pilotu və Formula 1-in son dünya çempionu Lando Norris avtoidmanda yeni layihəyə başlayıb. Britaniyalı pilot LN4 Fusion adlı gənclər üçün yarış komandasının həmtəsisçisi olub.
Yeni kollektiv 2027-ci ildən etibarən bir neçə aparıcı aşağı formula seriyasında mübarizə aparacaq. LN4 Fusion İtaliya Formula 4 çempionatı, Formula Regional European Championship (FRECA) və FIA Formula 3-də iştirak edəcək.
Komanda AIX Racing-in müəyyən aktivlərini, o cümlədən onun 2027-ci il Formula 3 iştirak hüququnu əldə edib. Layihənin gələcəkdə Formula 2-yə qoşulması üçün də müraciət edilib. Böyük Britaniyada isə komanda artıq Formula 4 üzrə test proqramına başlayıb və gələcəkdə bu çempionatda iştirak etməyi planlaşdırır.
LN4 Fusion-un bazaları İtaliya və Britaniyada olacaq
Komandanın Avropadakı əsas qərargahı İtaliyanın şimalındakı Veneto bölgəsində yerləşəcək. Burada LN4 Fusion-un beynəlxalq yarış proqramlarını idarə etmək üçün yeni baza yaradılır.
Britaniya bölməsi isə Kembricşirdə fəaliyyət göstərəcək. Komandanın rəhbəri gənclər seriyalarında böyük təcrübəyə malik Rene Rosin olacaq. O, uzun illər “Prema Racing”in uğurlarında mühüm rol oynayıb və müxtəlif çempionatlarda 40-dan çox titul qazanmış struktura rəhbərlik edib.
Norris yarış komandası ilə yanaşı, LN4 Legacy Programme adlı ayrıca pilot inkişaf proqramını da təsis edib. Layihə tam maliyyələşdiriləcək və istedadlı gənclərin maddi imkanlarının məhdud olması səbəbindən avtoidmanda irəliləmək şansını itirməsinin qarşısını almağa çalışacaq.
Proqrama “Alpine” Formula 1 komandasının keçmiş idman direktoru Culian Raus rəhbərlik edəcək. İştirakçılara maliyyə dəstəyi ilə yanaşı, məşqçilik, mentorluq, performansın inkişafı və karyera planlaşdırılması üzrə yardım göstəriləcək.
Norris bildirib ki, Formula 1-ə çatmaq üçün təkcə istedad kifayət etmir. Onun məqsədi LN4 Fusion-u gənclər seriyalarının ən güclü komandalarından birinə çevirmək və yeni nəsil pilotlara karyeralarını inkişaf etdirmək üçün daha geniş imkanlar yaratmaqdır.
