Beynəlxalq hakim Qüdrət İsmayılovun xatirəsinə həsr edilmiş “Guba Open 2026” II Beynəlxalq Şahmat Festivalına yekun vurulub. Sentyabrın 3-dən 10-dək davam edən turnirin bağlanış mərasimində müxtəlif kateqoriyalar üzrə qalib və mükafatçılar təltif ediliblər.
Gənclər və İdman Nazirliyi, Azərbaycan Şahmat Federasiyası və “Ağ Top” Şahmat Klubunun təşkilatçılığı ilə keçirilən festivalda 11 ölkədən 300-dən çox şahmatçı iştirak edib. Proqrama klassik şahmatla yanaşı, rapid, blits və norma turnirləri də daxil olub. Festivalın ümumi mükafat fondu 24 420 manat təşkil edib.
A turnirində qalibi əlavə göstəricilər müəyyənləşdirdi
Əsas A turnirində mübarizə doqquz tur davam edib. Qrossmeyster Misrəddin İskəndərov və beynəlxalq usta Vüqar Manafov hərəyə 7 xal toplayıblar. Əlavə göstəricilərdə üstün olan İskəndərov festivalın əsas turnirinin qalibi adını qazanıb, Manafov isə ikinci yeri tutub.
FIDE bayrağı altında çıxış edən qrossmeyster Mixail Mozharov 6,5 xalla üçüncü olub. Paşam Əlizadə də 6,5 xal toplasa da, əlavə göstəricilərə əsasən dördüncü pillədə qərarlaşıb.
B turnirində Əli Məmmədov 8 xal toplayaraq bütün rəqiblərini qabaqlayıb. Emin Gəncəliyev və Anar Bağışov isə hərəyə 7 xalla müvafiq olaraq ikinci və üçüncü yerləri bölüşüblər.
Rapid və blits turnirlərinin də qalibləri bəlli oldu
Festival çərçivəsində daha sürətli vaxt nəzarəti ilə keçirilən yarışlarda da Azərbaycan şahmatçıları fərqləniblər. Rapid turnirində Rüstəm Rüstəmov birinci yeri tutub. Blits yarışının qalibi isə Xaqan Əhməd olub.
Beləliklə, Qubada keçirilən festival müxtəlif reytinq və yaş qruplarından yüzlərlə şahmatçıya klassik, rapid və blits formatlarında mübarizə aparmaq imkanı yaradıb.
“Guba Open 2026” eyni zamanda “Azərbaycan Şahmat Turu”nun mərhələlərindən biri olub. Seriyanın növbəti beynəlxalq festivalı Gəncədə təşkil ediləcək. “Ganja Open 2026” oktyabrın 11-dən 18-dək Gəncə İdman Sarayında keçiriləcək. Yarışın proqramına A və B qrupları ilə yanaşı, rapid və blits turnirləri də daxildir.
