Türkiyənin “Trabzonspor” klubu baş məşqçi postunda dəyişikliyi rəsmiləşdirib. Fatih Tekke ilə yollarını ayıran Super Liqa təmsilçisi komandanı almaniyalı mütəxəssis Tomas Raysa həvalə edib.
52 yaşlı məşqçinin təyinatı klub tərəfindən rəsmən elan olunub. Rays üçün “Papara Park”da imza mərasimi də təşkil edilib. Mütəxəssis yeni komandasında işə başlamaqdan məmnun olduğunu və futbolçularla tanış olduqdan sonra hazırlıq prosesinə keçəcəyini bildirib.
Almaniyalı məşqçi üçün Super Liqa yad çempionat deyil. O, 2024–2026-cı illərdə “Samsunspor”un baş məşqçisi olub və komandanı 72 qarşılaşmada meydana çıxarıb. Bu oyunlarda “Samsunspor” 33 qələbə qazanıb, 18 dəfə heç-heçə edib və 21 dəfə məğlub olub.
Rays Almaniyada “Bochum” və “Şalke” klublarına da rəhbərlik edib. Onun son iş yeri isə Bolqarıstanın “Ludoqorets” klubu olub.
Tomas Rays “Trabzonspor” tarixində komandanın baş məşqçisi olan 45-ci fərqli mütəxəssisdir. O, eyni zamanda klubun 13-cü əcnəbi və dördüncü almaniyalı baş məşqçisi kimi tarixə düşüb.
Daha əvvəl Türkiyə klubuna Almaniyadan Yurgen Zundermann, Verner Biskup və Hans-Peter Briqel rəhbərlik ediblər.
Yeni baş məşqçi imza mərasimində Super Liqanın xüsusiyyətlərini yaxşı bildiyini vurğulayıb. Rays “Trabzonspor”la birlikdə uğur qazanmaq və klub tarixində iz buraxmaq istədiyini bildirib.
