Naxçıvan şəhərində 2026-cı ilin “Şəhərsalma və Memarlıq İli”nə həsr olunan “Velo Fest” velosiped festivalı təşkil edilib. Tədbir peşəkar və həvəskar velosipedçiləri bir araya gətirməklə yanaşı, sağlam həyat tərzinin və ekoloji nəqliyyatın təşviqinə yönəlib.
Festival Naxçıvan Muxtar Respublikası Gənclər və İdman Nazirliyi ilə “Gənc Peşəkar Velosipedçilər Klubu” İctimai Birliyinin birgə təşkilatçılığı, Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə keçirilib.
Tədbirin əsas məqsədləri sırasında gənclərin idmana marağının artırılması, velosipeddən ekoloji nəqliyyat vasitəsi kimi istifadənin genişləndirilməsi, velosiped mədəniyyətinin inkişafı və asudə vaxtın daha səmərəli təşkili yer alıb.
Velosipedçilər ümumilikdə 103 kilometr yol qət ediblər
Festival başlamazdan əvvəl peşəkar velosipedçilər Ordubad şəhərindən Naxçıvan şəhərinədək 96 kilometrlik marşrut üzrə hərəkət ediblər. Daha sonra onlar həvəskar iştirakçılarla birlikdə Naxçıvan şəhəri daxilində əlavə 7 kilometrlik veloyürüşə qoşulublar.
Beləliklə, peşəkar velosipedçilərin gün ərzində qət etdiyi ümumi məsafə 103 kilometrə çatıb. Şəhərdaxili yürüşə 100-dən çox peşəkar və həvəskar velosipedçinin qatılması nəzərdə tutulmuşdu.
Veloyürüş başa çatdıqdan sonra “Saat Meydanı” Turistik İstirahət Mərkəzində festivalın açılış mərasimi keçirilib. Dövlət Himni səsləndirilib, Heydər Əliyevin və şəhidlərin xatirəsi bir dəqiqəlik sükutla yad olunub.
Festival yalnız veloyürüşlə məhdudlaşmayıb
Tədbirdə Naxçıvan Muxtar Respublikası gənclər və idman nazirinin müavini, nazir vəzifələrini icra edən Məcid Seyidov, Naxçıvan Şəhər İcra Hakimiyyəti başçısının müavini Gülxanım Orucova və “Gənc Peşəkar Velosipedçilər Klubu” İctimai Birliyinin rəhbəri Vüqar Salahov çıxış ediblər. Çıxışlarda velosiped idmanının inkişafı, sağlam həyat tərzinin təşviqi və şəhərlərdə ekoloji nəqliyyatın əhəmiyyəti diqqətə çatdırılıb.
Festivalın təşkilinə dəstək verən qurumlara və veloyürüşdə fəallıq göstərən gənclərə təşəkkürnamələr təqdim olunub.
Proqram çərçivəsində fotosərgi, rəsm üzrə master-klass, maarifləndirici təlim sessiyası və viktorinalar da təşkil edilib. Festivalın bədii hissəsində isə incəsənət nümayəndələri konsert proqramı ilə çıxış ediblər.
