“Formula 1” üzrə Azərbaycan Qran-prisində üçüncü və son sərbəst yürüş başa çatıb. Bakı Şəhər Halqasında keçirilən sessiyada “Red Bull” pilotu Maks Ferstappen ən yaxşı nəticəni göstərərək sıralama turu öncəsi rəqiblərini qabaqlayıb.
İkinci nəticəni “Mercedes”in britaniyalı pilotu Corc Rassell göstərib. “Ferrari”ni təmsil edən yeddiqat dünya çempionu Lüis Hemilton isə üçüncü yeri tutaraq ilk üçlüyü tamamlayıb.
Bakıda üçüncü sərbəst yürüş saat 12:30-da başlayıb və bir saat davam edib. Bu sessiya komandalar və pilotlar üçün sıralama turundan əvvəl bolidlərin sazlanması və tras şəraitinin qiymətləndirilməsi baxımından son imkan olub.
Rassell ilk iki sərbəst yürüşdə lider idi
Azərbaycan Qran-prisinin ilk günündə üstünlük “Mercedes” pilotu Corc Rassellin tərəfində olub. O, həm birinci, həm də ikinci sərbəst yürüşdə ən sürətli nəticəyə imza atıb.
Birinci sessiyada Rassell 1:45.387 nəticə göstərərək Ferstappeni 0,400 saniyə qabaqlayıb. Şarl Lekler üçüncü, Lüis Hemilton isə dördüncü olub.
İkinci sərbəst yürüşdə britaniyalı pilot nəticəsini 1:43.347-yə qədər yaxşılaşdırıb. Onun komanda yoldaşı Kimi Antonelli ikinci, Ferstappen isə üçüncü pillədə qərarlaşıb.
Pilotlar sentyabrın 25-də saat 16:00-da sıralama turunda mübarizə aparacaqlar. Bu sessiyanın nəticələri Azərbaycan Qran-prisinin əsas yarışının start düzülüşünü müəyyənləşdirəcək.
