“Formula-1” üzrə 2026-cı il mövsümünün 17-ci mərhələsi olan Sinqapur Qran-prisinin sıralama turunda “Red Bull” pilotu Maks Ferstappen ən sürətli nəticəni göstərib. Niderlandlı sürücü “Marina Bey” şəhər trasında dövrəni 1 dəqiqə 31,373 saniyəyə tamamlayaraq yarışa birinci mövqedən başlamaq hüququ qazanıb.
Bu nəticə Ferstappenin karyerasında 50-ci poul-pozisiya olub. Dördqat dünya çempionu Sinqapurda ilk dəfə əsas yarışın sıralama turunu lider kimi başa vurub. O, daha əvvəl keçirilən sprint yarışında da qalib gəlməyi bacarıb.
Sinqapur Qran-prisinin sıralama turunun nəticələri
“Ferrari” pilotları sıralama mərhələsində güclü çıxış ediblər. Şarl Lekler liderdən cəmi 0,054 saniyə geri qalaraq ikinci, komanda yoldaşı Lyuis Hemilton isə 0,123 saniyə fərqlə üçüncü olub.
İlk beşliyin nəticələri:
- Maks Ferstappen (“Red Bull”) – 1:31,373
- Şarl Lekler (“Ferrari”) – +0,054 saniyə
- Lyuis Hemilton (“Ferrari”) – +0,123 saniyə
- Andrea Kimi Antonelli (“Mercedes”) – +0,189 saniyə
- Lando Norris (“McLaren”) – +0,339 saniyə
Çempionatın lideri Antonelli dördüncü mövqeyə sahib çıxıb. “McLaren”in britaniyalı sürücüsü Norris isə ilk beşliyi tamamlayıb.
Rassell cəzalandırıldı, Ferstappen qələbəyə hazırlaşır
“Mercedes” pilotu Corc Rassell sıralama turunda altıncı nəticəni göstərsə də, əsas yarışa son sıralardan başlayacaq. Buna səbəb bolidinin güc qurğusunun komponentlərinin dəyişdirilməsinə görə tətbiq olunan cəzadır.
Ferstappen üçün Sinqapur Qran-prisi xüsusi əhəmiyyət daşıyır. Niderlandlı pilot indiyədək bu trasda əsas yarışın qalibi olmayıb. Sıralama turundakı uğur ona bu seriyanı dayandırmaq üçün əlverişli imkan yaradıb.
Qeyd edək ki, Sinqapur Qran-prisinin əsas yarışı oktyabrın 11-də Bakı vaxtı ilə saat 16:00-da başlayacaq. Pilotlar 62 dövrə ərzində mübarizə aparacaqlar.
