Portuqaliyalı futbol əfsanəsi Kriştianu Ronaldu artıq 40 yaşındadır, lakin bu, onun inanılmaz fiziki hazırlığına mane olmur. Hazırda Səudiyyə Ərəbistanının “Əl-Nəsr” klubunda çıxış edən ulduz futbolçu 2026-cı ildə keçiriləcək dünya çempionatında oynamağa ciddi şəkildə hazırlaşır – o zaman 42 yaşı olacaq.
Ronaldu uzun illərdir bədən formasına olduqca ciddi yanaşır. Onun əzələli bədəni stadionlarda və sosial mediada daim diqqət mərkəzində olub. Bunu qorumaq üçün isə yalnız məşq deyil, qidalanma da mühüm rol oynayır.
Ronalduya enerji verən yemək: “Bakalhau a bras”
“Daily Mail”in məlumatına görə, Ronaldunun sevimli yeməyi – Bakalhau a bras – onun enerji mənbələrindən biridir. Bu, Portuqaliyanın məşhur ənənəvi yeməklərindən biridir və əsasən aşağıdakı inqrediyentlərdən hazırlanır:
- Duzlu morina balığı (bakalhau)
- Soğan
- Nazik doğranmış qızardılmış kartof
- Çırpılmış yumurta
Sadə və doyumlu olan bu yemək Ronaldunun həyatında xüsusi yer tutur, çünki uşaqlığında ona bu yeməyi anası hazırlayırdı. Bu səbəbdən o, bu yeməyi yalnız qidalanma deyil, nostalji və motivasiya mənbəyi kimi də qəbul edir.
Lisabondakı şəxsi restoranında bu yemək, məhz anasının reseptinə uyğun bişirilir. Ronaldu dəfələrlə bildirib ki, bu yemək onu uşaqlıq xatirələrinə aparır və həm fiziki, həm də mənəvi güc verir.
Sağlamlığın sirri: ciddi pəhriz
Ronaldu heç vaxt qidalanma mövzusunda təsadüfi davranmayıb. Onun gündəlik rasionunda bol protein, minimum şəkər və demək olar ki, heç bir alkoqol yoxdur. O, içki olaraq yalnız saf suya üstünlük verir və qazlı içkilərdən uzaq durur.
Onun bu dəmir intizamı, düzgün qidalanması və həyat tərzi, onu 40 yaşında belə yüksək səviyyədə futbol oynamağa qadir edir.
