Bakı Şəhər Halqası (BŞH) 2016-cı ildən etibarən “Formula-1” dünya çempionatının mərhələlərindən birinə ev sahibliyi edir. Bu yarış təkcə sürət və rəqabət deyil, həm də Azərbaycanın mədəniyyətini və paytaxtın gözəlliklərini dünyaya tanıdan unikal tədbirdir. İlk dəfə Avropa Qran-prisi adı ilə təşkil olunan yarış, sonradan Azərbaycan Qran-prisi kimi tanınıb və azarkeşlər arasında populyarlıq qazanıb.
Yaddaqalan anlar
Bakı trası hər il dramatik və gözlənilməz hadisələrlə yadda qalır. Budur, ən diqqətçəkən məqamlardan bəziləri:
- 2017-ci il: “Ferrari” pilotu Sebastyan Fettel ilə “Mercedes” sürücüsü Lyuis Hemilton arasında gərgin insident.
- 2018-ci il: Valtteri Bottasın son döngədə təkərinin partlaması səbəbindən qələbəni əldən verməsi.
- 2021-ci il: Maks Ferstappenin qəzası və Lyuis Hemiltonun finişə iki dövrə qalmış səhvi.
Yeni format və nailiyyətlər
2023-cü ildə Azərbaycan Qran-prisi yenilənmiş sprint formatı ilə keçirilib. Bu formatda:
- Cümə günü sprint sıralanma turu;
- Şənbə günü sprint yarışı və əsas sıralanma turu;
- Bazar günü əsas yarış təşkil olunub.
Bu dəyişikliklər həftəsonunu azarkeşlər üçün daha dinamik və maraqlı edib. Həmin il “Red Bull”un sürücüsü Serxio Peres Bakıda ikinci qələbəsini qazanaraq trasın ən uğurlu pilotlarından birinə çevrilib.
Mədəni tədbirlər
Azərbaycan Qran-prisi təkcə idman hadisəsi deyil, həm də mədəni bayramdır. Yarış həftəsonlarında keçirilən konsertlərdə dünya ulduzları çıxış edib:
- Kris Braun
- Enrike İqlesias
- “The Black Eyed Peas”
- Dua Lipa
- Cemiroquay
- Kardi Bi
Bu konsertlər Bakını minlərlə tamaşaçı üçün əyləncə mərkəzinə çevirib.
2025-ci il yarışının özəllikləri
Bu ilki Qran-pri həm idman, həm də təşkilati yeniliklərlə zəngin olacaq. Bakı Şəhər Halqası İçərişəhər, Azadlıq meydanı və Dənizkənarı bulvar kimi ərazilərdən keçən marşrutu ilə sürücülər üçün sürət və strategiyanın sınaq meydanıdır. Azarkeşləri fan-zonalarda interaktiv tədbirlər, musiqi proqramları və sürprizlər gözləyir.
