Maks Ferstappen artıq dəfələrlə bildirib ki, Formula 1-də əsas məqsədinə çatıb – ilk dünya çempionluğunu qazanıb. Qalan hər şey onun üçün bu uğura əlavə bonuslardır. Lakin bu, o demək deyil ki, hollandiyalı pilot gələcək barədə düşünmür. Xüsusən 2026-cı ildən qüvvəyə minəcək yeni aerodinamika və mühərrik qaydaları fonunda güc balansı tamamilə dəyişə bilər. Mercedes başda olmaqla bəzi komandalar zirvəyə qayıtmaq niyyətindədir. Bəs Ferstappenin qarşısında hansı yollar var?
Mövcud müqavilə və ayrılıq opsiyası
Ferstappen 2022-ci ildə Red Bull ilə 2028-ci ilin sonuna qədər qüvvədə olan uzunmüddətli müqavilə imzalamışdı. Lakin mediada yayılan məlumata görə, müqavilədə 2025 mövsümündən sonra komandadan ayrılmağa imkan verən bir maddə mövcuddur. Bu opsiyanın detalları gizli saxlanılsa da, bəzi məlumatlara əsasən, əgər Ferstappen 2025-ci ilin ortasında pilotlar çempionatında ilk üçlükdə olmazsa, müqaviləni pozmaq hüququna malikdir. Digər versiyaya görə, Red Bull Konstruktorlar Kubokunda ilk üçlükdə olmasa, bu halda müqavilə avtomatik olaraq qüvvədən düşür.
Variantlar
Red Bull-da qalmaq
Red Bull hələ də Ferstappenin ətrafında qurulmuş bir komandadır. O, komandanın açıq-aşkar lideri və tarixi üzrə ən uğurlu pilotudur. Əsas mühəndis Adrian Nyuinin və menecer Kristian Hornerin gedişi gələcək baxımından suallar doğursa da, Ferstappen üçün Red Bull yenə də komfort zonasıdır.
Ancaq 2026-cı ildən sonra istifadə ediləcək Ford mühərrikləri barədə narahatlıqlar var. Red Bull-un mühərrik hazırlığında rəqiblərindən geri qaldığına dair şayiələr yayılıb. Buna baxmayaraq, Ferstappen 2026 mövsümündə güc balansına baxıb daha sonra qərar verə bilər.
Mercedes-ə keçid
Ən real və güclü alternativ. Mercedes-in 2026 üçün ən yaxşı mühərriki hazırladığı deyilir. Komanda çempionluq təcrübəsinə və struktura malikdir. Hətta deyilənə görə, Mercedes Ferstappenə uyğun şərait yaratmaq üçün Ceyc Rassell və gənc istedad Antonellidən belə imtina etməyə hazırdır.
Əgər Ferstappen uğura indi və dərhal çatmaq istəyirsə, Mercedes ideal məkandır.
Aston Martin
Adrian Nyuinin transferindən sonra bu variant aktuallaşıb. İddialara görə, Aston Martin sahibi Lorens Stroll Ferstappenə 5 il üçün 1 milyard avroluq müqavilə təklif etməyə hazırdır. Lakin komandanın zirvəyə çatması vaxt tələb edir və 2026-cı ildə bu hədəfə çatıb-çatmayacağı qeyri-müəyyəndir.
2026-cı ili buraxmaq
Ferstappen dəfələrlə Formula 1-də onu narahat edən məsələləri qeyd edib: yorucu media öhdəlikləri, sıx qrafik, şəxsi azadlığın məhdudluğu və s. Belə olan halda bir il yarışlardan uzaq qalmaq, ailəsinə və istirahətə vaxt ayırmaq onun üçün məntiqli ola bilər.
Yeni texniki qaydaların təsiri ilə hansı komandanın zirvəyə qalxacağını izləmək və sonra ən uyğun olanı seçmək – bu da Ferstappen üçün lüks bir seçim ola bilər. O, istənilən halda geri döndükdə lider statusunu qoruyacaq.
Nəticə
Maks Ferstappen qarşıdakı mövsümlər üçün bir neçə real seçimin astanasındadır. Red Bull-da qalmaq, Mercedes-ə keçmək, Aston Martin-ə qoşulmaq və ya sadəcə bir illik fasilə götürmək. Hər biri özünəməxsus üstünlüklərə malikdir, lakin qərar tamamilə Ferstappenə məxsusdur. 2026 Formula 1 mövsümü təkcə texniki baxımdan deyil, həm də karyeralar baxımından yeni bir dövrə çevrilə bilər.
