Bakıda keçirilən fiqurlu konkisürmə üzrə Qran-pri turnirində yeniyetmə qadınlar arasında qısa proqram yarışması baş tutub. Bu mərhələdə 30 ölkədən 35 idmançı iştirak edib və səviyyəli mübarizə yaşanıb.
Nəticələrə baxdıqda, İsraildən Sofia Şifrin 61.57 xalla birinci yeri tutub və fəxri kürsünün ən yüksək pilləsinə qalxıb. İkinci yerə Çin təmsilçisi Yi Van Honq 60.96 xal toplayaraq, üçüncü isə Cənubi Koreyadan Hevon Dju olub.
Azərbaycan təmsilçiləri arasında Arina Kaluqina 57.87 xalla 6-cı yeri alıb. Digər Azərbaycanlı idmançılar Səbinə Əliyeva 35.76 xalla 28-ci, Leyli Axundova isə 35.33 xalla 29-cu yerlərdə qərarlaşıblar.
Qran-pri yarışları Azərbaycan Dövlət Turizm Agentliyi, Gənclər və İdman Nazirliyi, Azərbaycan Qış İdman Növləri Federasiyası və Beynəlxalq Konkisürmə Birliyinin birgə təşkilatçılığı ilə keçirilir. Turnirdə ümumilikdə 38 ölkədən 92 idmançı mübarizə aparır.
Yarışın ikinci günü kişilər sərbəst proqram üzrə, cütlüklər isə qısa rəqs proqramı ilə çıxış edəcəklər.
