Londonun “Arsenal” klubu Madrid “Real”ının braziliyalı ulduzu Vinisius Junioru transfer etmək variantını ciddi şəkildə nəzərdən keçirir. Məlumata görə, İngiltərə çempionu cinah hücumçusunu heyətinə qatmaq üçün ona klub tarixinin ən yüksək maaşını təklif etməyə hazırdır.
Hazırda Vinisiusun “Real”la yeni müqavilə üzrə danışıqları hələ də yekunlaşmayıb. Məhz bu qeyri-müəyyənlik Premyer Liqa təmsilçisinin vəziyyəti yaxından izləməsinə səbəb olub. Bununla belə, Madrid klubu futbolçunu komandada saxlamaq niyyətindədir və yaxın günlərdə tərəflər arasında yeni danışıqların keçiriləcəyi gözlənilir.
Maaş məsələsi əsas maneəyə çevrilib
Hazırda “Arsenal”ın ən çox qazanan futbolçusu Bukayo Sakadır. Lakin Vinisiusun Londona keçidi baş tutarsa, braziliyalı bu göstəricini geridə qoyaraq komandanın ən yüksək maaş alan oyunçusuna çevriləcək.
Məlumata əsasən, Vinisius hazırda “Real”da ildə təxminən 15 milyon avro xalis əməkhaqqı alır. Madrid təmsilçisi yeni müqavilə ilə onun maaşını 20 milyon avrodan yuxarı qaldırmağa hazır olsa da, futbolçunun tərəfi illik 30 milyon avro civarında qazanc tələb edir. Məhz bu maliyyə fərqi müqavilənin uzadılmasını çətinləşdirən əsas səbəblərdən biri hesab olunur.
26 yaşlı braziliyalının “Real”la hazırkı müqaviləsi 2027-ci ilin yayına qədər qüvvədədir. Razılıq əldə olunmasa, Madrid klubu futbolçunu gələn yay sərbəst buraxmamaq üçün transfer təkliflərini dəyərləndirə bilər. Bununla yanaşı, Joze Mourinyonun Vinisiusun komandada qalmasının tərəfdarı olduğu bildirilir.
Ötən mövsüm Vinisius bütün turnirlərdə 53 oyunda 22 qol və 14 məhsuldar ötürmə ilə yadda qalıb. Bu göstəricilər onun Avropanın aparıcı klublarının transfer siyahısında yer almağa davam etdiyini göstərir.
