Fransalı tennisçi Artur Fils karyerasının ən böyük uğurlarından birinə imza ataraq ABŞ-da keçirilən Sinsinnati Masters turnirinin qalibi olub. 22 yaşlı tennisçi ATP 1000 kateqoriyalı yarışın finalında amerikalı Frensis Tiafonu üç setdə məğlub edib.
Final qarşılaşması 1 saat 28 dəqiqə davam edib. İlk setdə üstün oyun nümayiş etdirən Fils 6:3 hesabı ilə qalib gəlib. Tiafo ikinci hissədə təşəbbüsü ələ alaraq 6:1 hesabı ilə tarazlığı bərpa etsə də, həlledici set tamamilə fransalının üstünlüyü ilə keçib. Fils rəqibinə bir geym belə vermədən 6:0 hesablı qələbə ilə çempionluğu rəsmiləşdirib.
ATP 1000 Sinsinnati – final
Artur Fils (Fransa) – Frensis Tiafo (ABŞ) – 6:3, 1:6, 6:0
Bu, tennisçilərin ikinci qarşılaşması olub. Fils əvvəlki dueldə də Tiafo üzərində qələbə qazanmışdı.
Fransalı tennisçi Sinsinnatidə titul yolunda güclü rəqibləri mübarizədən kənarlaşdırıb. O, turnirin gedişində Aleks de Minaur və yarımfinalda Flavio Kobolli də daxil olmaqla rəqiblərini məğlub edərək ilk dəfə Masters 1000 finalına yüksəlib.
Fils finalda 11 eys edib və səkkiz breyk imkanından dördünü reallaşdırıb. Qələbə ona karyerasında ilk ATP Masters 1000 titulunu qazandırıb.
Fils Fransa tennisinin tarixinə düşdü
Sinsinnatidəki uğur 22 yaşlı tennisçiyə daha bir neçə tarixi göstəriciyə çatmağa imkan verib. Fils Masters 1000 seriyası tarixində titul qazanan ən gənc fransalı olub. O, həmçinin Jo-Vilfrid Tsonqanın 2014-cü ildə Torontodakı qələbəsindən sonra bu səviyyədə çempion olan ilk Fransa təmsilçisidir.
Fils Sinsinnatidə Açıq Era dövründə çempionluq qazanan ikinci fransalı tennisçi kimi də tarixə düşüb. Buna daha əvvəl yalnız 1991-ci ildə Gi Forje nail olmuşdu.
Fransalı 2026-cı ildə Masters 1000 turnirlərində 20-ci qələbəsini qazanaraq həmyerliləri arasında bir mövsüm üçün yeni rekord müəyyənləşdirib. Əvvəlki ən yaxşı göstərici 2016-cı ildə 19 qələbə əldə edən Qael Monfisə məxsus idi.
Sinsinnatidəki çempionluq Filsin dünya reytinqində də yeni şəxsi rekord müəyyənləşdirməsinə imkan verəcək. O, ATP sıralamasında 11-ci pilləyə yüksələcək.
