“Barselona” Misir millisinin 18 yaşlı hücumçusu Həmzə Əbdülkərimlə bağlı uzunmüddətli plan qurub. Kataloniya klubu futbolçu ilə 30 iyun 2030-cu ilədək nəzərdə tutulan yeni müqavilə üzrə razılığa gəlib.
Yeni sözləşmənin rəsmi imzalanması sentyabrın 15-də klub prezidenti Joan Laportanın iştirakı ilə keçiriləcək. İspaniya mətbuatının məlumatına görə, müqavilədə Həmzənin sərbəstqalma məbləği əvvəlki 15 milyon avrodan 150 milyon avroya qaldırılacaq.
Qeyd edək ki, futbolçu 1 yanvar 2008-ci ildə anadan olub və hazırda 18 yaşı var.
Deku Həmzənin komandada qalmasını istəyib
Yay transfer dövründə gənc hücumçu üçün icarə variantları olsa da, “Barselona”nın idman direktoru Deku onun klubda qalmasının tərəfdarı olub. Kataloniyalılar hesab edirlər ki, Hans-Diter Flikin rəhbərliyi altında əsas komanda ilə məşqlər futbolçunun uyğunlaşmasını və inkişafını sürətləndirəcək.
Həmzənin oyun xüsusiyyətləri də bu qərarda rol oynayıb. Misirli hücumçu cərimə meydançasında təhlükəli olması və qol vəziyyətlərini tamamlaması ilə seçilir. Klub onun xüsusilə rəqibin sıx müdafiə olunduğu qarşılaşmalarda fərqli hücum variantı yarada biləcəyini düşünür.
Həmzə “Barselona”ya 2026-cı il fevralın 1-də əvvəlcə icarə əsasında qoşulub. U-19 komandasında keçirdiyi doqquz liqa oyununda altı qol vurub. Yayda “Barselona” onun satınalma hüququndan istifadə edərək transferini rəsmiləşdirib.
Əsas komandada artıq debüt edib
Gənc forvard yay hazırlığı zamanı Flikin əsas komandasında özünü göstərib. Dörd qol vuran Həmzə “Barselona”nın mövsümöncəsi hazırlıq dövrünün ən məhsuldar futbolçusu olub.
Avqustun 31-də “Rayo Valyekano” ilə La Liqa matçında meydana çıxan hücumçu “Barselona”nın əsas komandasında rəsmi debütünü edib. Bununla da o, klub tarixində rəsmi oyunda meydana çıxan ilk misirli futbolçu olub.
Həmzə həmçinin 2026/27 mövsümü üçün “Barselona”nın Çempionlar Liqasının liqa mərhələsinə təqdim etdiyi heyətə daxil edilib. Klub onu əsas komanda ilə “Barselona Atletik” arasında inkişaf etdirərək tədricən daha böyük rol verməyi planlaşdırır.
