İspaniyalı tennisçi Karlos Alkaras US Open 2026-da uğurlu çıxışını davam etdirərək 1/4 finala yüksəlib. Turnirin ikinci nömrəli raketkası dördüncü raundda amerikalı Tommi Polu üç setdə məğlub edib – 6:4, 6:3, 6:4.
Artur Eş stadionunda keçirilən qarşılaşma 2 saat 21 dəqiqə davam edib. Alkaras matç ərzində rəqibinə cəmi bir breyk imkanı verib və Nyu-Yorkdakı növbəti inamlı qələbəsini rəsmiləşdirib.
İspaniyalı US Open-un əvvəlki mərhələlərində Roman Safiullin, Jayme Faria və U İbini də mübarizədən kənarlaşdırmışdı. O, turnirdə keçirdiyi dörd qarşılaşmada cəmi bir set uduzub.
Alkaras şəxsi rekordunu yenilədi
Pol üzərində qələbə Alkaras üçün “Böyük Dəbilqə” turnirlərində ardıcıl 18-ci uğur olub. Bu, 23 yaşlı tennisçinin karyerasında ən uzun seriyadır.
Alkaras ötən il US Open-un qalibi olub, 2026-cı ilin əvvəlində isə Australian Open-da çempionluq yaşayıb. Sağ biləyindən aldığı zədə səbəbindən dörd aydan çox kortlardan kənarda qalan ispaniyalı Nyu-Yorkda mövsümün ikinci yarısındakı ilk turnirini keçirir.
Tommi Pol ilə şəxsi görüşlərdə də Alkaras üstünlüyünü artırıb. Bu, tennisçilərin doqquzuncu qarşılaşması olub və ispaniyalı yeddinci qələbəsini qazanıb.
US Open 2026, 1/8 final
- Tommi Pol [20] – Karlos Alkaras [2] – 4:6, 3:6, 4:6
Alkarasın US Open-dakı ümumi göstəricisi artıq 28 qələbə və 3 məğlubiyyətdir. O, Nyu-Yorkda ardıcıl 11 matçdır məğlub olmur.
Alkaras karyerasında 15-ci dəfə “Böyük Dəbilqə” turnirinin 1/4 finalına yüksəlib. US Open-da isə o, altı iştirakının beşində bu mərhələyə çatıb. İspaniyalı 2022 və 2025-ci illərdə Nyu-Yorkda çempion olub. Onun 1/4 finala çıxa bilmədiyi yeganə mövsüm 2024-cü il olub – həmin vaxt Botik van de Zandşulp ikinci raundda sensasiyaya imza atmışdı.
İspaniyalının növbəti rəqibi artıq müəyyənləşib. ABŞ təmsilçisi Ben Şelton 1/8 finalda Stefanos Tsitsipası 6:2, 6:3, 6:4 hesabı ilə məğlub edərək Alkarasla görüşə vəsiqə qazanıb.
Alkaras və Şelton indiyədək üç dəfə qarşılaşıblar və bütün matçlarda ispaniyalı qalib gəlib. Onların US Open-un yarımfinalına vəsiqə uğrunda görüşü sentyabrın 8-də keçiriləcək.
