Robert Levandovski “Barselona”dan ayrıldıqdan sonra ABŞ-də karyerasını qollarla davam etdirir. MLS təmsilçisi “Çikaqo Fayr”ın formasını geyinən polşalı hücumçu Liqalar Kubokunda “Santos Laquna” ilə qarşılaşmada fərqlənib.
“Çikaqo Fayr” Meksika klubunu doğma meydanda 3:1 hesabı ilə məğlub edib. Görüşdə hesabı 20-ci dəqiqədə Ezekiel Bullaude açıb. Meydan sahibləri isə ikinci hissədə geridönüş etməyi bacarıblar.
Filip Zinkernagel 72-ci dəqiqədə hesabı bərabərləşdirib, Robin Lod isə 90-cı dəqiqədə “Çikaqo Fayr”ı önə keçirib. Matçın yekun nəticəsini əlavə vaxtın üçüncü dəqiqəsində Levandovski müəyyənləşdirib. Polşalı hücumçu rəqib qapıçının dəf etdiyi topu tamamlayaraq hesabı 3:1 edib.
Levandovski “Çikaqo Fayr”da üçüncü qolunu vurdu
Bu, 37 yaşlı forvardın ABŞ klubunun heyətində üçüncü qolu olub. Levandovski daha əvvəl MLS-də “Şarlott”la matçda dubl müəllifi olmuşdu.
“Çikaqo Fayr” Liqalar Kubokunda keçirdiyi ilk iki qarşılaşmanın hər ikisini qələbə ilə başa vurub. Komanda turnirdəki ilk oyununda “Nekaksa”nı 2:0 hesabı ilə məğlub etmişdi.
Levandovskinin ABŞ-də yeni mərhələyə başlamasından sonra keçmiş klubu da onun Kataloniyadakı xidmətlərini xüsusi şəkildə qiymətləndirib. “Barselona” polşalı futbolçunun adını rəsmi saytındakı “Əfsanələr” bölməsinə daxil edib.
4 mövsüm və əfsanə statusu: “Barselona” Levandovskiyə xüsusi yer verdi
Levandovski 2022-ci ilin yayında “Bavariya”dan “Barselona”ya keçib və Kataloniya təmsilçisində dörd mövsüm keçirib. Onun klubla bağladığı dördillik müqavilə 2026-cı ilin yayında başa çatıb.
Polşalı hücumçu İspaniyadakı debüt mövsümündə La Liqanın qalibi olub və 23 qolla çempionatın bombardiri adını qazanıb. İkinci mövsümündə bütün turnirlərdə 26 dəfə fərqlənib.
Levandovskinin “Barselona”dakı üçüncü mövsümü daha məhsuldar keçib. Hücumçu bütün yarışlarda 42 qol vuraraq komandanın ölkə çempionatı və İspaniya Kubokunu qazanmasına töhfə verib. 2025/26 mövsümündə isə daha çox rotasiyada yer almasına baxmayaraq, 19 qol vurub.
Ümumilikdə Levandovski “Barselona”nın heyətində bütün turnirlərdə 120 qol vurub və klub tarixinin ən məhsuldar futbolçuları arasında 14-cü pilləyə yüksəlib. Dörd mövsümlük İspaniya macərasından sonra ABŞ-yə yollanan hücumçu indi “Çikaqo Fayr”ın heyətində qol hesabını artırır.
