Bakıda keçirilən “Formula-2” üzrə Azərbaycan Qran-prisinə ikinci əsas yarışla yekun vurulub. Bakı Şəhər Halqasında keçirilən son mübarizədə “Invicta Racing” komandasının braziliyalı pilotu Rafael Kamara finiş xəttini birinci keçib.
İkinci yeri “Campos Racing”in bolqarıstanlı sürücüsü Nikola Tsolov tutub. “Rodin Motorsport” komandasının irlandiyalı pilotu Aleks Dann isə üçüncü nəticə göstərərək podiumu tamamlayıb.
Kamara üçün Bakıdakı qələbə çempionluq mübarizəsi baxımından da mühüm nəticə olub. O, bir gün əvvəl keçirilən ilk əsas yarışda dördüncü yeri tutaraq sürücülərin ümumi sıralamasında liderliyə yüksəlmişdi.
Bakıdakı son yarış qəza ilə başlayıb
İkinci əsas yarışın ilk dövrəsində insident yaşanıb. “Trident” komandasının britaniyalı pilotu Con Bennett idarəetməni itirərək bolidini baryerlərə çırpıb. Qəza nəticəsində Bennett mübarizəni erkən dayandırmalı olub və onun avtomobili trasdan kənarlaşdırılıb.
Bakı mərhələsi “Formula-2”nin 2026-cı il mövsümünün 12-ci raundu olub. Azərbaycan Qran-prisi bu il xüsusi genişləndirilmiş formatda keçirilib. Həftəsonu proqramına bir sərbəst yürüş, iki sıralama sessiyası, bir sprint və iki əsas yarış daxil edilib. Bu, mövsümdə belə formatdan istifadə olunan yeganə mərhələdir.
“Formula-2” pilotları üç gün ərzində Bakı Şəhər Halqasında gərgin mübarizə aparıblar. Sentyabrın 25-də keçirilən sprint yarışında “DAMS Lucas Oil” pilotu Dino Beqanoviç qalib gəlib. Laurens van Hoepen ikinci, Aleks Dann isə üçüncü olub.
Beləliklə, Bakıda keçirilən üç “Formula-2” yarışında müvafiq olaraq Beqanoviç, Dann və Kamara qələbə qazanıblar.
