Türkiyə futbolunda mərc oyunları ilə bağlı aparılan genişmiqyaslı araşdırmanın yeni mərhələsi açıqlanıb. Türkiyə Futbol Federasiyası (TFF) son beş il ərzində mərc oynadığı müəyyən edilən 448 klub rəhbəri və rəsmisini Peşəkar Futbol İntizam Komitəsinə (PFDK) göndərib.
Araşdırma 2026/27 mövsümündə Super Liqa və Birinci Liqada mübarizə aparan klublarda son beş ildə inzibati vəzifələrdə çalışmış şəxsləri əhatə edir. TFF həmin şəxslərin vəzifədə olduqları dövrdə mərc oyunlarında iştirak etdiklərinin müəyyənləşdirildiyini bildirib.
Federasiyanın qərarına əsasən, adı siyahıya daxil edilən şəxslər Futbol İntizam Təlimatının 57-ci maddəsi əsasında sentyabrın 30-dan etibarən ehtiyat tədbiri tətbiq edilməklə PFDK-ya göndəriliblər.
Siyahının ən diqqətçəkən adlarından biri “Trabzonspor”un prezidenti Ertuğrul Doğandır.
Türkiyənin dörd nəhəng klubundan 31 nəfər siyahıdadır
TFF-nin açıqladığı məlumatlara əsasən, “Beşiktaş”, “Fənərbağça”, “Qalatasaray” və “Trabzonspor”la əlaqəli ümumilikdə 31 rəhbər şəxs PFDK-ya göndərilib:
- “Beşiktaş” – 10 nəfər: Tarkan Şer, Kerem Gürel, Fırat Fidan, Miraç İltuğ Sungur, Kadir Kılıç, Mustafa Mollaoğlu, Hakan Daltaban, İbrahim Kemal Barış Dillioğlu, Enis Ulusoy, Serhan Çetinkaya.
- “Fənərbağça” – 3 nəfər: Eren Ali Dişli, Bekir Erdem, Erdem Sezer.
- “Qalatasaray” – 5 nəfər: Emir Aral, Özgür Işıtan Gün, Ali Yüce, Maruf Güneş, Ural Aküzüm.
- “Trabzonspor” – 13 nəfər: Yalçın Orhan, Zeyyat Kafkas, Murat İskender, Kemal Ertürk, Taner Fikret Saral, Lokman Sadıklar, Şenol Kaynar, Ertuğrul Doğan, Abdulkadir Ferda Başkan, Semih Hekimoğlu, Derviş Köz, İbrahim Şahinkaya, Ceyhun Eskiçi.
PFDK-ya göndərilmə həmin şəxslər barəsində yekun cəzanın verildiyi anlamına gəlmir. İntizam Komitəsi işləri araşdırdıqdan sonra hər bir şəxslə bağlı ayrıca qərar qəbul edəcək.
Türkiyə futbolunda mərc qaydalarının pozulmasına görə intizam tədbirləri daha əvvəl də tətbiq olunub. Futbol İntizam Təlimatının 57-ci maddəsi futbol ictimaiyyətinin üzvlərinin futbol qarşılaşmaları və futbolla əlaqəli fəaliyyətlər üzrə mərc oynamasını qadağan edir.
