Bakıda keçirilən U-17 dünya güləş çempionatında bu gün Azərbaycan millisi üçün həlledici yarış günlərindən biri olacaq. Yunan-Roma güləşi üzrə dörd idmançı medal uğrunda xalçaya çıxacaq, eyni zamanda qadın güləşi yarışlarında daha dörd təmsilçimiz mübarizəyə start verəcək.
Milli Gimnastika Arenasında davam edən dünya çempionatında Azərbaycan komandası artıq ilk uğurlarını qazanıb. Yunan-Roma güləşçiləri indiyədək üç medal əldə ediblər. İsfahan Həsənov (80 kq) gümüş, Ömər Salmanov (48 kq) və Orxan Həbibli (65 kq) isə bürünc medala sahib olublar.
Dörd güləşçi medal uğrunda xalçaya çıxacaq
Bu gün Azərbaycan yığmasının daha dörd üzvü mükafatçılar sırasında yer almağa çalışacaq.
Əli Cavadlı (45 kq) final görüşündə ABŞ təmsilçisi Raylen Vaks ilə qızıl medal uğrunda qarşılaşacaq.
Abdurrahman Hüseynli (51 kq) isə həlledici qarşılaşmada Özbəkistan güləşçisi Bunyod Hasanov ilə üz-üzə gələcək.
Yarımfinalda məğlub olan Elmir Çərkəzov (60 kq) bürünc medal uğrunda xalçaya çıxacaq.
Zöhrab Səfərov (92 kq) isə əvvəlcə təsəlliverici görüşdə iranlı Amirreza Mehritalarpoşti ilə qarşılaşacaq. Bu görüşdə qalib gələcəyi halda bürünc medal uğrunda mübarizə aparmaq hüququ qazanacaq.
Qadın güləşçilər mundiala start verir
Bu gün həmçinin qadın güləşi yarışlarında Azərbaycanın daha dörd idmançısı ilk görüşlərini keçirəcək.
1/8 final mərhələsində:
- 43 kq: Vəfa Orucova – Valya Harsan (Rumıniya)
- 49 kq: Nazrin Əhmədli – Madina Bayramova (Almaniya)
Təsnifat mərhələsində:
- 57 kq: Qətel Guliyeva – Delya Gisler (İsveçrə)
- 65 kq: Rəna Nuriyeva – Silvia Espinosa Munis (Meksika)
Bakıda keçirilən U-17 dünya çempionatı Milli Gimnastika Arenasında davam edir. Turnirdə 60-dan çox ölkədən 700-ə yaxın yeniyetmə güləşçi iştirak edir. Azərbaycan mundialda 29 idmançı ilə təmsil olunur və ev sahibi komanda medal sayını artırmağı hədəfləyir.
