“Atletiko Madrid”in qapıçısı Yan Oblak İspaniya çempionatında yeni tarixi göstəriciyə çatıb. Sloveniyalı qolkiper La Liqada 400 oyun keçirən ilk əcnəbi qapıçı olub.
33 yaşlı futbolçu yubiley matçını 2026/27 mövsümünün ilk turunda keçirib. Madrid klubu doğma meydanda “Malaqa”nı 2:0 hesabı ilə məğlub edib. “Atletiko”nun qollarını ikinci hissədə Li Kan İn və Aleks Baena vurublar.
Oblak bununla yanaşı, İspaniyanın yüksək liqasında 400 matç həddinə çatan qapıçılar arasında yerini möhkəmləndirib.
Sloveniya millisinin qapıçısı 2014-cü ilin yayında “Benfika”dan Madrid klubuna keçib. O, “Atletiko”nun heyətində ilk rəsmi matçını həmin ilin sentyabrında Çempionlar Liqasında “Olimpiakos”a qarşı keçirib.
Oblak uzun illər ərzində Dieqo Simeonenin komandasının əsas simalarından birinə çevrilib. O, “Atletiko” ilə La Liqa, Avropa Liqası, UEFA Superkuboku və İspaniya Superkubokunun qalibi olub. Qapıçı həmçinin karyerası ərzində dəfələrlə Zamora mükafatına layiq görülüb.
La Liqada qapıçılar arasında oyun sayına görə tarixi rekord isə hələ də Andoni Subisarretaya məxsusdur. Əfsanəvi ispaniyalı qolkiper yüksək liqada 622 matç keçirib.
