2026-cı ildə ABŞ, Kanada və Meksikanın birgə ev sahibliyi edəcəyi futbol üzrə dünya çempionatı başlamamışdan əvvəl ciddi hava problemləri ilə gündəmə gəlib. Mütəxəssislər hesab edir ki, yay aylarında müşahidə olunan həddindən artıq istilər, yüksək rütubət, meşə yanğınlarından yayılan tüstü və güclü tufanlar turnirin gedişinə ciddi təsir göstərə bilər.
İqlim üzrə araşdırmalar göstərir ki, turnirin keçiriləcəyi 16 şəhərin bir çoxunda futbolçular və azarkeşlər üçün risk yaradan hava şəraiti formalaşa bilər. Xüsusilə ABŞ-ın bəzi bölgələrində temperaturun çox yüksəlməsi və havadakı rütubətin artması matçların keçirilməsini çətinləşdirə bilər.
Şimşək və tufan təhlükəsi matçları dayandıra bilər
ABŞ-də idman tədbirləri zamanı tətbiq olunan təhlükəsizlik qaydaları səbəbindən şimşək böyük problem hesab olunur. Əgər stadiondan 10 mil radiusunda ildırım müşahidə edilərsə, oyun ən azı 30 dəqiqə dayandırılır. Yeni ildırım çaxması qeydə alınarsa, vaxt yenidən hesablanır.
Bu problem ötən il keçirilən FIFA Klublararası Dünya Çempionatında da açıq şəkildə hiss olunmuşdu. Ağır göy gurultulu fırtına və ildırıma görə bir neçə oyun təxirə salındı və ya dayandırıldı.
Delaver Universitetinin iqlim mütəxəssisi Kelsi Malloy bildirib ki, qlobal istiləşmə səbəbindən gələcək illərdə ildırım hadisələrinin sayının artacağı gözlənilir. Onun sözlərinə görə, bir çox azarkeş təhlükənin yalnız tufanı görəndə başladığını düşünür, halbuki ildırım kilometrlərlə uzağa düşə bilər.
Florida Universitetinin tədqiqatçısı Ziqin Din də stadionların ildırımdan qorunma sistemlərinin güclü olduğunu desə də, yaxınlıqda baş verən ildırımın matçların gedişinə asanlıqla təsir edə biləcəyini vurğulayıb.
Həddindən artıq istilər futbolçular üçün risk yaradır
Turniri qəbul edən bəzi stadionlar dam və kondisionerlə təchiz olunub. Atlanta, Dallas, Hyuston, Los-Anceles və Vankuverdə yerləşən arenalar bu baxımdan daha təhlükəsiz hesab olunur. Lakin bir çox stadion açıq havadadır və bu da həm futbolçular, həm də azarkeşlər üçün ciddi çətinlik yarada bilər.
2025-ci ildə keçirilən FIFA klub turniri zamanı bəzi oyunlar 32 dərəcədən yuxarı temperaturda baş tutmuşdu. Yüksək rütubət isə havanı daha ağır hiss etdirirdi. İqlim üzrə alimlər hesab edir ki, 2026 Dünya Çempionatında matçların təxminən dörddə biri təhlükəli istilik şəraitində keçirilə bilər.
FIFA artıq oyunlar zamanı hər hissədə soyutma fasilələrinin tətbiq ediləcəyini açıqlayıb. Bununla belə, London İmperial Kollecinin həkimi Kris Mallinqton bəzi futbolçuların adət etdikləri intensivlikdə oynaya bilməyəcəyini bildirib.
Onun fikrincə, əsas risk yalnız oyunçular üçün deyil. Bir çox azarkeş günəş altında uzun müddət qalacaq, bəzi hallarda alkoqol istifadəsi də vəziyyəti daha da ağırlaşdıra bilər. Xüsusilə xroniki xəstəlikləri olan insanlar üçün bu hava şəraiti təhlükəli hesab olunur.
Norveçli futbolçu Morten Torsbinin rəhbərlik etdiyi bir qrup hazırkı və sabiq oyunçu FIFA-ya müraciət edərək isti hava şəraitinə qarşı daha ciddi tədbirlərin görülməsini tələb edib. Açıq məktubda qeyd olunub ki, yüksək temperatur başgicəllənmə, halsızlıq, əzələ spazmları və digər sağlamlıq problemləri yarada bilər.
Futbol dünyasında artıq bir çoxları hesab edir ki, iqlim böhranı böyük idman turnirlərinin təşkilinə birbaşa təsir göstərməyə başlayıb və 2026 Dünya Çempionatı bunun ən böyük nümunələrindən biri ola bilər.
