Misli Premyer Liqasının XIX turu maraqlı qarşılaşmalar və turnir cədvəlində mühüm dəyişikliklərlə yadda qaldı.
“Sabah” liderliyini qorumaqda davam etdi, “Qarabağ” Şamaxıda dramatik qələbə qazandı, “Neftçi” isə ağır oyunla növbəti 3 xalını hanəsinə yazdırdı. “Zirə”nin səfər qələbəsi, “Turan Tovuz”un minimal hesablı uğuru və “İmişli” – “Kəpəz” matçının qolsuz nəticəsi turun digər diqqətçəkən məqamları oldu.
- “Sabah” – “Araz-Naxçıvan” 4:1
Lider “Sabah” Masazırda inamlı oyun nümayiş etdirdi və artıq ilk 16 dəqiqədə 3 qol vuraraq matçın taleyini həll etdi.
Umarali Rəhmonəliyevin penalti qolu, ardınca Aron Maluda və Xəyal Əliyevin dəqiq zərbələri komandaya erkən üstünlük qazandırdı. İkinci hissədə hər iki komanda bir qol vurdu və yekun nəticə 4:1 oldu.
“Sabah” 46 xalla hələ də turnirin zirvəsindədir, “Araz-Naxçıvan” isə 27 xalla 6-cı yerdə qalıb.
- “Sumqayıt” – “Zirə” 2:3
Sumqayıtda hər iki komanda hücuma meyilli oyun sərgilədi. “Zirə” iki dəfə hesabda öndə olsa da, meydan sahibləri ardıcıl olaraq cavab verə bildi. Lakin oyuna sonradan daxil olan Georgi Papunaşvilinin 88-ci dəqiqədə vurduğu qol qonaqlara əhəmiyyətli səfər qələbəsi gətirdi.
- “İmişli” – “Kəpəz” 0:0
Ağır meydan şəraiti komandaların hücum qurmasına mane olurdu. Hər iki kollektiv ehtiyatlı oynadı və nəticədə matç qolsuz başa çatdı. “İmişli” 19 xalla 9-cu, “Kəpəz” isə 13 xalla 11-ci yerdədir.
- “Turan Tovuz” – “Karvan-Yevlax” 1:0
Tovuz təmsilçisi lazım olan qələbəni penalti sayəsində əldə etdi. Aleksandro Serranonun 15-ci dəqiqədəki zərbəsi matçın yeganə qolu oldu. Qurban Berdıyevin komandası oyun boyunca böyük üstünlük yaratmasa da, hesabı qorumağı bacardı.
“Turan Tovuz” 33 xalla 3-cü pillədədir. “Karvan-Yevlax” isə 6 xalla turnirin sonuncu yerində qalıb.
- “Şamaxı” – “Qarabağ” 1:2
Turun ən dramatik görüşü Şamaxıda baş tutdu. 15-ci dəqiqədə Oruç Məmmədovun gözəl solo reydi meydan sahiblərini irəli çıxardı. Üç dəqiqə sonra Xoni Montiel tarazlıq yaratdı. Matçın taleyi isə 90+3-cü dəqiqədə müəyyənləşdi – Kamilonun qolu “Qarabağ”a həyati əhəmiyyət daşıyan qələbə qazandırdı.
Ağdam təmsilçisi 42 xalla 2-ci yerdə qərarlaşır, “Şamaxı” isə 23 xalla 8-cidir.
- “Neftçi” – “Qəbələ” 1:0
Yuriy Vernidubun komandası minimal hesabla da olsa, ardıcıl qələbələrini davam etdirir. Oyunun 12-ci dəqiqəsində Emin Mahmudov dəqiq zərbə ilə fərqləndi. İkinci hissədə “Qəbələ”nin basqısı güclənsə də, “Neftçi” üstünlüyünü qorudu. Matçın sonunda Elvin Bədəlov qırmızı vərəqə ilə meydanı tərk etdi.
