Amerikalı qrossmeyster Hikaru Nakamura Kiprdə keçirilən Namizədlər Turnirində tətbiq olunan sərt təhlükəsizlik tədbirlərini kəskin tənqid edib. Onun sözlərinə görə, yarışda tətbiq edilən qaydalar həddindən artıqdır və oyunçular üçün narahatlıq yaradır.
Xatırladaq ki, bu turnir dünya şahmatında ən vacib yarışlardan biridir və qalib dünya çempionu Qukeş Dommaracu ilə titul uğrunda qarşılaşmaq hüququ qazanacaq. Məhz buna görə təşkilatçılar təhlükəsizlik məsələlərinə xüsusi diqqət ayırıb.
Nakamura bildirib ki, yarış zamanı tətbiq olunan yoxlamalar onun üçün qəbuledilməz səviyyədədir:
“Bu, tamamilə absurddur. Açıq danışım: bizi partiyadan əvvəl də, sonra da skan edirlər. Metal detektorlar, müxtəlif skanerlər var. Özümü sanki İranda Mossad agenti kimi hiss edirəm. Gəlin dürüst olaq, bu artıq çoxdur”.
Qrossmeyster qeyd edib ki, belə tədbirlər bəlkə də kiçik açıq turnirlərdə əsaslı görünə bilər, lakin bu səviyyədə yarışda artıq həddən artıq sərt yanaşmadır:
“Burada bütün oyunçular bir məkandadır, hakimlər hər şeyi nəzarətdə saxlayır, kameralar hər kəsi izləyir. Belə olan halda əlavə yoxlamalara ehtiyac yoxdur”.
FIDE fərqli mövqedədir
Bununla belə, Beynəlxalq Şahmat Federasiyası (FIDE) Nakamuranın tənqidlərini qəbul etməyib. Quruma görə, tətbiq olunan təhlükəsizlik qaydaları turnirin şəffaf və ədalətli keçirilməsi üçün vacibdir.
FIDE nümayəndələri bildiriblər ki, iştirakçıların əksəriyyəti bu tədbirlərlə bağlı narazılıq bildirməyib və qaydalar ümumi təhlükəsizlik standartlarına uyğundur.
Ekspertlər hesab edir ki, texnologiyanın inkişafı ilə yanaşı şahmatda da təhlükəsizlik məsələləri daha çox ön plana çıxır və bu, gələcək turnirlərdə də müzakirə mövzusu olaraq qalacaq.
