Uzun fasilədən sonra peşəkar boksa qayıtmağa hazırlaşan Vasili Lomaçenko artıq növbəti rəqibi ilə bağlı qərarını verib. Keçmiş dünya çempionunun filippinli məğlubedilməz boksçu Çarli Suareslə döyüş keçirmək istədiyi bildirilir.
Məlumata görə, ukraynalı idmançı bu qarşılaşmanı karyerasına uğurlu dönüş üçün ən uyğun variant hesab edir. Hazırda 38 yaşı olan Lomaçenko iki ildən çoxdur rəsmi döyüş keçirməyib və bu səbəbdən risk səviyyəsi daha aşağı rəqiblə rinqə qayıtmağa üstünlük verir.
Lomaçenko yeni titul şansına hazırlaşır
Çarli Suares indiyədək peşəkar rinqdə məğlub olmayıb. Filippinli boksçunun aktivində 18 qələbə var. Onun sürətli və aqressiv döyüş tərzi son illərdə bir çox mütəxəssisin diqqətini cəlb edib.
Lomaçenkonun komandası isə bu görüşü gələcək titul döyüşünə hazırlıq mərhələsi kimi qiymətləndirir. Ukraynalı boksçu Suares üzərində qələbə qazanacağı halda birinci yüngül çəkidə dünya çempionu Emanuel Navarrete ilə döyüş şansı əldə etməyə ümid edir.
Üç müxtəlif çəki dərəcəsində dünya çempionu olmuş Lomaçenko peşəkar boks tarixinin ən texnikalı idmançılarından biri hesab olunur. O, son illərdə zədələr və uzun fasilələr səbəbindən aktivliyini azaltsa da, yenidən böyük səhnəyə qayıtmaq niyyətini gizlətmir.
Boks ictimaiyyətində də mümkün Lomaçenko – Suares qarşılaşmasına maraq böyükdür. Tərəflər arasında danışıqların yaxın həftələrdə yekunlaşacağı gözlənilir.
