FIFA-nın yenilənmiş dünya reytinqi Azərbaycan milli komandasının mövqeyində geriləmə ilə yadda qalıb. Son açıqlanan siyahıya əsasən, yığmamız əvvəlki reytinqlə müqayisədə iki pillə aşağı enərək 126-cı sırada qərarlaşıb.
Ayxan Abbasovun rəhbərlik etdiyi komandanın aktivində hazırda 1132 xal var. Son reytinq yenilənməsi milli komandanın iyun ayında keçirdiyi yoldaşlıq oyunlarının nəticələrindən sonra formalaşıb. Azərbaycan yığması bu müddətdə iki fərqli nəticə əldə edib: Malta millisinə məğlub olub, San Marino üzərində isə qələbə qazanıb.
Yoldaşlıq oyunları reytinqə təsir etdi
Milli komanda hesabat dövründə keçirdiyi ilk oyunda Malta seçməsinə 0:2 hesabı ilə uduzub. Daha sonra isə San Marino ilə qarşılaşmada 2:1 hesablı qələbə qazanaraq azarkeşlərini sevindirib. Buna baxmayaraq, ümumi xal hesablaması yığmanın mövqeyini qorumasına kifayət etməyib.
FIFA reytinqi milli komandaların son nəticələri, rəqiblərin səviyyəsi və oyunların əhəmiyyəti nəzərə alınmaqla hesablanır. Məhz bu meyarlar əsasında Azərbaycan yığması iki pillə geriləyərək 126-cı yerə düşüb.
Planetin ən güclü milli komandası statusunu dünya çempionu Argentina qoruyub saxlayıb. Cənubi Amerika təmsilçisi 1877,27 xalla reytinq cədvəlinin lideridir. İkinci pillədə Avropa çempionu İspaniya (1874,71 xal), üçüncü sırada isə Fransa millisi (1870,70 xal) yer alıb.
