Niderland futbolunun əfsanəvi simalarından biri olan Lui van Qaal “Ayaks” klubunda Müşahidə Şurasının futbol məsələləri üzrə müşaviri vəzifəsindən istefa verib. Amsterdam təmsilçisi 74 yaşlı mütəxəssisin qərarı barədə rəsmi açıqlama yayıb və tərəflərin əməkdaşlığına son qoyulduğunu təsdiqləyib.
Van Qaal 2023-cü ilin oktyabrından etibarən Müşahidə Şurasına futbol strategiyası və kadr məsələləri üzrə məsləhətlər verirdi. O, daha əvvəl “Ayaks”da baş məşqçi və texniki direktor kimi də çalışıb və klub tarixinin ən uğurlu dövrlərindən birində mühüm rol oynayıb.
Qərarın səbəbi struktur dəyişiklikləri olub
Lui van Qaal istefasını klubdakı idarəetmə strukturunun son illərdə əhəmiyyətli dərəcədə dəyişməsi ilə izah edib. Onun sözlərinə görə, 2023-cü ildə “Ayaks”a qayıdarkən əsas məqsədi futbol sahəsində yaranmış boşluğu doldurmaq və rəhbərliyə dəstək vermək idi.
Təcrübəli mütəxəssis bildirib ki, həmin dövrdə Aleks Kroes və Marayn Böyker kimi futbol rəhbərlərinin təyinatında yaxından iştirak edib. Lakin sonradan Mixael van Praaqın, Aleks Kroesin və Marayn Böykerin klubdan ayrılması onun da missiyasını başa çatdırdığı qənaətinə gəlməsinə səbəb olub.
“Ayaks” rəhbərliyi yayımladığı bəyanatda Van Qaala göstərdiyi xidmətlərə görə təşəkkür edib və onun qərarına hörmətlə yanaşdıqlarını vurğulayıb. Klub həmçinin niderlandlı mütəxəssisin çətin dövrdə verdiyi töhfənin təşkilat üçün böyük əhəmiyyət daşıdığını qeyd edib.
